BCTL lansa relatóriu trimestre datoluk fundu petrolíferu, segunda (09/11), iha sala enkontru Banku Sentrál, Akait. Imajen/BCTL

DILI, 09 novembru 2020 (TATOLI)—Nu’udar jestór ba fundu petrolíferu, Banco Central de Timor-Leste (BCTL) lansa relatóriu trimestrál datoluk ba dala-62, ne’ebé kobre hosi 01 jullu to’o 30 setembru 2020.

Hosi relatóriu ne’e hatudu katak kapitál fundu sa’e ba biliaun $18,47, ne’ebé iha trimestrál anteriór ho kapitál biliaun $18,07.

“Kapitál fundu sa’e hosi kontribuisaun osan kontadu brutu fundu, ne’ebé tama hosi kontribuinte, realeza (royalties) hamutuk millaun $43,53,” Vise-Governadór BCTL, Venâncio Alves Maria, informa liuhosi nota ne’ebé Agência TATOLI asesu, segunda ne’e.

Vise-Governadór ne’e dehan, osan kontadu líkidu ne’ebé sai hosi fundu durante trimestre ne’e hamutuk millaun $172,26, kompostu hosi millaun $169,50 transfere ba Orsamentu Jerál Estadu (OJE) 2020 no millaun $2,76 kobre kustu jestaun nian.

Notísia Relevante: Fundu mina-rai trimestre daruak sa’e ba biliaun $18,07

Reseita líkidu durante trimestre ne’e hamutuk millaun $128,73 no rendimentu portofóliu iha períodu ne’e mak 2,90%, kompara ho rendimentu referénsia 2,99%.

Relatóriu ne’e mós haktuir katak atividade ekonomia globál kontinua rekupera hosi krize ne’ebé kauza husi pandemia, maski rekuperasaun ne’e ladún signifikativu tuir espetativa.

“Purchasing Manager’s Index (PMI) globál, ne’ebé hanesan índise atu sukat atividade manufatura no servisu sira, hatudu katak atividade negósiu kontinua aumenta maibé lakon forsa iha fulan ikus trimestre ida ne’e,” refere nota.

Índise PMI kompozitu globál tun ba 52,1 hosi 52,4 iha agostu, tanba ne’e halo rekoperasaun ne’ebé fraku iha fulan-setembru tanba kazu COVID-19 aumenta fali iha nasaun barak iha mundu, partikularmente iha rejiaun Europea, ne’ebé medida restrisaun sira hanesan konfinamentu no distánsia sosiál sira introdúz filafali iha área sira ne’ebé afetadu hodi prevene surtu iha área sira-ne’e.

Maski nune’e, relatóriu ne’e fó sai katak trimestre ne’e hatudu pasu pozitivu fundu petróliferu, tanba folin merkadu asaun no folin tezouru globál merkadu dezenvolvidu sira hatudu mudansa favorável ba investimentu fundu nian.

“Total fundu ninia retornu ba períodu ne’e maka 2,9%, mai hosi karteira rendimentu fixu ho retornu 0,28% no karteira asaun ninia retornu 7,5%,” subliña nota.

Jornalista: Florêncio Miranda Ximenes
Editora: Julia Chatarina

HAKEREK NO HATÁN

Please enter your comment!
Please enter your name here