Kondisaun Eskola Bázika Filiál Santa Teresinha Quelicai grave. Imajen TATOLI/Joanico de Araújo.

DILI, 06 novembru 2020 (TATOLI)—Ministériu Edukasaun Juventude no Desportu (MEJD), liuhosi ezekusaun Orsamentu Jerál Estadu (OJE) 2021 nian sei konsentra ba kontrusaun foun no reabilitasaun edifísiu eskola hamutuk 800-resin husi eskola 221 iha Timor-Leste.

Projetu infraestrutura bázika hirak ne’e sei implementa iha Munisípiu Aileu hamutuk projetu 14, Ainaro 16, Baucau 26, Bobonaro 22, Covalima 17, Dili 24, Ermera 16, Lautem 18, Liquiça 14, Manatuto 12, Manufahi 16, Viqueque 20.

Notísia Relevante :MEJD prevee millaun $100-resin ba OJE 2021

Ministru Edukasaun Juventude no Desportu (MEJD), Armindo Maia, hateten projetu hirak ne’e sei ezekuta ho orsamentu ne’ebé prevee ba item kapitál dezenvolvimentu ho montante millaun $7.015.951.

“Ita sei bazeia ba modalidade tolu ne’ebé ita iha mak kapitál dezenvolvimentu rasik, transferénsia públikas no fundu infraestrutura. Ita adopta modalidade tolu ne’e tanba iha eskola kuaze 800-resin mak atu halo iha faze dahuluk. entaun ita labele bazeia de’it ba osan husi fundu kapitál dezenvolvimentu nian. tanba se lae tinan ida ne’e ita bele halo de’it pursentu 50,” dehan nia ba jornalista sira iha Parlamentu Nasionál, sesta ne’e.

Entretantu, tuir identifikasaun MEJD nian nota totál eskola hamutuk 1.500 maka presiza hetan reabilitasaun.

Notísia Relevante :MEJD prevee millaun $ 68-resin ba OJE 2020

Jornalista : Tomé Amado  

Editór:Agapito dos Santos

HAKEREK NO HATÁN

Please enter your comment!
Please enter your name here