Komunidade Suku Tashilin hamutuk 2,853 simu ai-han liuhosi programa Governu "Cesta Bázika". Imajen Tatoli/Hortencio Sanches

COVALIMA, 07 novembru 2020 (TATOLI)– Membru Governu ka governante  na’in-neen, sábadu ne’e, ofisializa lansamentu distribuisaun Cesta Bázika ba komunidade 2,853 iha Suku Tashilin, Postu Administrativu Zumalai, Munisípiu Covalima.

Notísia Relevante : Populasaun 2,853 iha Covalima sei simu Cesta Bázika

Governante hirak-ne’e, maka hanesan Ministru Koordenadór ba Asuntu Ekonómiku (MCAE), Joaquim Amaral, Ministru Administrasaun Estatál (MAE), Miguel de Carvalho, Ministru Asuntu Parlamentár no Komunikasaun Sosiál (MAPKOMS), Francisco Jerónimo, Sekretáriu Estadu Kooperativa (SEKoop), Elizario Ferreira, Sekretáriu Estadu Arte no Kultura (SEAC), Teófilo Caldas no Sekretáriu Estadu Meiu Ambiente (SEA), Demétrio Amaral.

Komunidade Suku Tashilin hamutuk 2,853 ne’ebé simu ai-han hosi programa Governu, Cesta Bázika ne’e, mai hosi aldeia haat, mak hanesan Aldeia Kulu-oan, Basana, Galitas no Boroiku.

Komunidade ua’in ne’e ho entuziazmu hakbesik ba halibur malu iha resintu sede suku hodi simu sira-nia “direitu” Cesta Báziku nu’udar oferta ida hosi Governu hodi hakmaan sira-nia nesesidade iha ámbitu Estadu Emerjénsia dahituk hodi luta kontra propagasaun peste letál Coronavirus ka COVID-19.

“Ohin, primeira lansamentu ne’ebé ita hala’o iha Munisípiu Covalima iha Suku Tasilin no ba oin ita sei halo mós iha munisípiu seluk. Ita boot sira ohin simu ne’e bele lori ba uma hodi konsumu ai-han hirak ne’e,” SEKoop Elizario Ferreira  hateten iha nia intervensaun.

Elizario Ferreira esklarese katak programa Cesta Bázika ne’e hanesan faze ida hodi halo rekuperasaun ba ekonomia no koordena hamutuk ho ministériu sira hanesan, Ministériu Agrikultura no Peska (MAP), Ministériu Koordenadór Asuntu Ekonomia (MKAE), Ministériu Administrasaun Estatál (MAE), SEKoop no seluk tan.

Iha fatin hanesan benefisiária  ba Cesta Bázika, Amelia Pereia hateten, sira-nia parte kontente tanba Governu bele fó ai-han maski ho valor ne’ebé la’ós atu kobre nesesidade tomak iha fulan tomak ida nia laran.

“Agradese ba Governu nia laran luak ohin to’o iha ami nia fatin hodi fó ai-han mai ami,” Amelia hateten.

Produtu ai-han ne’ebé governu oferese ba komunidade sira liuhosi programa Cesta Bázika ne’e mak hanesan  foos, fore-mungu, fore-rai, batar, mina, susubeen, sabaun, masin, kafé, mantolun no pastadente.

Produtu hirak ne’ebé governu fahe ba populasaun sira sosa rasik hosi populasaun sira iha Covalima liu hosi kontrata ne’ebé SEKoop halo ho kompañia lokál sira iha Covalima.

Tenke badinas kuda produtu lokál

Oportunidade ne’e, SEKoop Elizario Ferreira, husu ba agrikultór sira hotu iha Covalima atu badinas halo to’os no natar, nune’e bele kuda produtu lokál hodi fa’an fali ba Governu.

“Governu fó fiar nafatin ba populasaun iha Covalima ne’e servisu hamutuk ho kompañia sira ho kooperativu sira hodi badinas halo servisu kuda produtu lokál hodi mobiliza imi nia produtu sira nune’e governu bele sosa fali distribui fila fali ba ita boot sira hodi ajuda Governu rekoopera ekonomia iha nasaun ne’e,” Elizario hateten.

“Hanoin ba oin ita badinas liután halo servisu bele kontribui ona ba hadi’a família nia nesesidade. Merkadu importante ba ita mak ne’e, primeiru edukasaun se ita prodús hare, koto barak liután mak Ministériu Edukasaun sosa fó merenda eskolár ba alunu sira. Merkadu ida tan mak Ministériu Saúde bele fan hodi oferese ba ita-nia maluk sira moras iha ospitál duke ita sosa beibeik nasi bungkus iha warung sira,” nia afirma tan.

Jornalista: Hortencio Sanchez

Editór: Francisco Simões

HAKEREK NO HATÁN

Please enter your comment!
Please enter your name here