Membru Governu na’in tolu partisipa iha atividade kolleta hare époka daruak iha Atabae. Imajen Tatoli/Natalino Costa

BOBONARO, 05 novembru 2020 (TATOLI)—Ministériu Agrikultura no Peska (MAP) halo kolleta hare ba époka daruak iha rai ektare ida, iha suku Aidaba-leten, postu administrativu Atabae, munisípiu Bobonaro.

Atividade ne’e realiza ho prezensa hosi Ministru Agrikultura no Peska, Pedro Reis, Ministru Koordenadór Asuntu Ekonómiku, Joaquim Amaral inklui no Ministru Turizmu, Komérsiu no Indústria, José Lucas do Carmo da Silva.

Ministru Pedro Reis iha intervensaun apresia ho programa ‘prátika agrikultór’ tanba bele lori mudansa ba agrikultór sira.

“Ha’u kontente haree ohin ita-nia agrikultór sira kolleta iha époka daruak iha Atabae, ha’u kontinua esforsu hodi implementa programa ne’e tanba bele ajuda sira hasa’e  produsaun di’ak liután,” Ministru tenik iha seremónia kolleta hare, iha suku Aidaba-leten, kinta ne’e.

Notísia Relevante: Sensu agríkola 2019: propriedade agríkola família boot liu maka Bobonaro

Biban ne’e, governante ne’e husu ba kamponéz Atabae sira hodi kolabora ho MAP liuhosi programa prátika agrikultór, nune’e bele fó susesu no bele hasa’e produsaun.

“Ha’u kontinua esforsu hodi bele tulun agrikultór sira, maibé ha’u husu imi kolabora ho Ministériu Agrikultura no Peska no ba oin tenke badinas kuda. Ha’u espera bele ajuda hodi kuda liután,” nia realsa.

Nune’e mós, Ministru Joaquim Amaral husu kultivadór sira hatudu espíritu no badinas halo produsaun.

“Ha’u kontente haree kolleta ohin, maski la barak maibé di’ak. Tanba ne’e ha’u enkoraja agrikultór Atabae atu kuda liután hodi hasa’e produsaun rai-laran,” nia apresia.

Ministru dehan, Governu sei apoiu no insentiva povu agrikultór liuhosi meiu oin-oin.

Autoridade husu hadi’a irrigasaun

Iha fatin hanesan, Presidente Autoridade Bobonaro, Jeferino dos Santos, apresia esforsu MAP liuhosi programa prátika agrikultór tanba bele ajuda kamponéz sira no tempu hanesan kontente ho prezensa membru Governu sira ne’ebé tun direita hala’o atividade.

“Ohin onra boot tanba kolleta hare iha époka ne’e hetan partisipasaun hosi membru Governu sira,” nia tenik.

Jeferino husu ba MAP atu tau atensaun ba irrigasaun iha Atabae tanba balun a’at no la funsiona ona hodi difikulta atividade agrikultór.

“Ha’u husu MAP tau atensaun ba kestaun ne’e hodi fasilita agrikultór sira kuda liu hodi hetan rezultadu di’ak liután,” nia subliña.

Notísia Relevante: Tinan oin, MAP sei hadi’a irrigasaun ualu

Seremónia ne’e partisipa hosi membru Governu na’in tolu, parseiru dezenvolventu, diretór hosi MAP, inklui autoridade lokál.

Entretantu, bazeia ba rezultadu sensu agríkola 2019 hatudu katak 60% agregadu familiár nasionál halo atividade agrikultura no propriedade agríkola okupa estensaun ektare 219.250.

Hosi númeru ne’e, munisípiu ho área propriedade agríkola família boot liu maka Bobonaro ho propriedade ektare 41.000 resin, Ermera ho ektare 40.000 resin no Baucau ho propriedade 25.000 resin, enkuantu munisípiu sira ne’ebé área agríkola menus liu maka Lautém ektare 8.555 no Manatuto ektare 3.371.

Rezultadu ne’e hatudu katak iha 141.738 propriedade agríkola, ne’ebé 141.141 maka pertense ba propriedade familiár no  597 ba instituisaun privada sira.

Jornalista: Natalino Costa

Editora: Julia Chatarina 

HAKEREK NO HATÁN

Please enter your comment!
Please enter your name here