Prezidente Institutu Politékniku Betano (IPB), Acácio Cardoso Amaral. Imajen Tatoli/Egas Cristovão

DILI, 04 outubru 2020 (TATOLI)—Institutu Politékniku Betano (IPB) prevee ona osan millaun $1.349.502 iha proposta Orsamentu Jerál Estadu (OGE-sigla portugés) tinan 2021 hodi hari’i edifísiu foun.

“Ami propoin ona orsamentu ba 2021 nian liuhusi fundu infraestrutura ho montante millaun $1,3-resin para atu halo konstrusaun ba ami-nia kampus IPB,” dehan Prezidente Institutu Politékniku Betano, Acácio Cardoso, ba jornalista sira iha Kampus UNTL Dili, kuarta ne’e.

Notísia Relevante :IPB sei fó graduasaun dahuluk ba estudante finalista 158

Bazeia ba estatutu IPB iha Eskola Superiór Agronomia no Zootéknia (ESAZ) no Eskola Superiór Enjeñaria (ESE).

Iha Eskola Superiór Agronomia no Zootéknia (ESAZ) iha Kursu Produsaun Animál no kursu sira seluk sei estabelese iha futuru hanesan saúde animál, prosesamentu alimentár, floresta no agronomia.

Eskola Superiór Enjeñaria (ESE) nia okos iha kursu Konstrusaun Sivíl. Tanba ne’e ho edifísiu foun ne’e sei hari’i ne’e maka sei loke tan kursu Informasaun Teknolojia (IT), Mekánika no Eletrónika ba futuru.

“Loloos ne’e fasilidade iha instituisaun ensinu superiór ida tenke adekuadu atu nune’e bele garante prosesu aprendizajen bele la’o ho di’ak, ezemplu pratika ba estudante sira tenki apoiu ho ekipamentu maibé to’o agora IPB seidauk iha entaun durante ne’e hetan hela apoiu husi Sentru Formasaun Tibar kada tinan estudante sira mai tuir formasaun adekuadu durante fulan tolu,” nia hateten.

Notísia Relevante :2020, IPB loke vaga ba estudante 300

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here