Membru Governu-sira hamutuk ho dirijente hosi ministériu implementadór distribui Cesta Bázika iha Aldeia Palaka, kinta (05/11). Imajen Tatoli/Natalino Costa

BOBONARO, 05 novembru 2020 (TATOLI)–Governu kontinua distribui Cesta Bázika ba komunidade iha aldeia Palaka, suku Sanirin, postu administrativu Balibo, munisípiu Bobonaro.

Ministru Koordenadór Asuntu Ekonómiku, Joaquim Amaral, husu ba komunidade atu koopera fó susesu ba distribuisaun produtu ai-han.

“Husu ba komunidade sira atubele serbisu hamutuk ho autoridade lokál, nune’e ema hotu bele sai benefisiáriu ba programa Governu ne’e,” Ministru tenik iha aldeia Palaka, kinta ne’e.

Governante ne’e dehan, distribuisaun Cesta Bázika ho objetivu atu fó apoiu ba komunidade iha kada família iha situasaun COVID-19.

“Programa ne’e fó oportunidade ba produtór sira hodi kuda no Governu sosa fali hodi fahe ba komunidade,” nia akresenta.

Notísia Relevante: Governu kontinua distribui Cesta Bázika ba komunidade Metinaro

Iha fatin hanesan, Ministru Turizmu, Komérsiu no Indústria, José  Lucas do Carmo da Silva, hateten situasaun COVID-19 seidauk fó ameasa ba Timor-Leste, maibé ho situasaun ne’e fó oportunidade ba agrikultór sira atu hasa’e produsaun hodi fa’an produtu ai-han ba Governu.

Governante ne’e apresia vontade autoridade no komunidade lokál ne’ebé bele koopera ho di’ak.

“Ha’u kongratula Autoridade munisípiu Bobonaro inklui komunidade ne’ebé hatudu prontidaun realiza atividade Cesta Bázika,” nia dehan.

Nune’e mós, Xefe suku Sanirin, Augosto Dato, informa ohin loron konsege distribui maibé seidauk konsege konklui, tanba ne’e distribuisaun sei kontinua to’o aban.

“Totál komunidade iha aldeia Palaka hamutuk 619, maibé ohin foin ema na’in-300 mak simu, espera to’o aban sasán sira bele fahe hotu ba ema,” Autoridade lokál ne’e

Nia husu ba ministériu implementadór programa, bainhira halo distribuisaun tenke halo preparasaun ho di’ak tanba prepara ba loron ida de’it la to’o atu kobre ba ema hotu.

Maski nune’e, Autoridade lokál ne’e apresia programa Governu iha ámbitu rekuperasaun ekonómika.

“Ha’u sente kontente ho desizaun Governu halo destribuisaun produtu Cesta Bázika, ho ida-ne’e bele responde nesesidade família maski oituan maibé di’ak,” nia dehan.

Atividade distribuisaun ai-han ne’e partisipa hosi membru Governu balun, Autoridade lokál, parseiru dezenvolvimentu.

Programa ne’e hahú lansa iha loron 23 outubru iha Metinaro no sei kontinua ba munisípiu seluk.

Programa Cesta Bázika destina ba membru idaidak agregadu familiár sei hetan produtu ai-han lokál ho valór $25 iha munisípiu sira, enkuantu iha Dili sei hetan voucher ne’ebé bele troka ho sasán iha loja ne’ebé korresponde ba valór osan $25, ba kada fulan durante fulan-rua nia laran.

Ba planu kurtu prazu iha tinan ne’e, Governu implementa medida haat ho kustu totál millaun $113,4, hanaran mitigasaun impaktu ekonómiku no sosiál ba krize COVID-19, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normaliza hikas atividade ekonómika.

Hosi medida haat ne’e, inklui hotu ho Cesta Bázika ba família, ho totál kustu ba implementasaun hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here