Distribuisaun Cesta Bázika iha Aldeia Manuleu, Matinaro, sábadu (31/10). Imajen Tatoli/Nelson de Sousa

METINARO, 31 outubru 2020 (TATOLI)-Governu liuhosi Ministériu Turizmu, Komérsiu no Indústria (MTKI) kontinua halo distribuisasun Cesta Bázika  iha ámbitu programa rekuperasaun ekonómika kurtu prazu ba komunidade suku Benunuc no Mantelolau, postu administrativu Metinaro, munisípiu Dili.

Ministru Turizmu, Komérsiu no Indústria, José Lucas do Carmo da Silva, apresia esforsu ekipa hotu ne’ebé kontinua hala’o distribuisaun produtu ba komunidade iha situasaun difísil ne’ebé mundu hotu hasoru.

“Iha prosesu ne’e, ha’u husu komunidade hotu atu koopera fasilita dokumentu sira ne’ebé rejistu atu aprezenta ba entidade relevante hodi bele simu apoiu sira, nune’e programa ne’e bele la’o ho di’ak,” Ministru José Lucas tenik iha ámbitu distribuisaun Cesta Bázika iha aldeia Manuleu, suku Mantelolau, postu administrativu Metinaro, sábadu ne’e.

Notísia Relevante: Governu ofisialmente halo lansamentu nasionál programa Cesta Bázika

Ai-han sira ne’ebé distribui sosa hosi agrikultór lokál, nune’e bele insentivu kuda no promove produtu rai-laran hodi responde ba nesesidade no sirkula iha merkadu.

Membru Governu ne’ebé partisipa iha distribuisaun Cesta Bázika. Imajen Tatoli/Nelson de Sousa

Iha fatin hanesan, Ministru Koordenadór Asuntu Ekonómiku, Joaquin Amaral, hateten inisiativa dezeña programa ne’e tanba nasaun no povu hasoru situasaun ekonomia defisíl tanba impaktu hosi COVID-19.

“Situasaun defisíl la’ós ba ita ida-idak maibé ba mós kompañia no to’os-na’in sira, tanba ne’e mak Estadu introdús medida hola ai-han hosi to’os-na’in, komersiante ho loja sira atu nune’e bele fahe filafali ba povu. Ida-ne’e atu hatudu Estadu nia sensibilidade ba povu iha situasaun defísil,” nia subliña.

Governante ne’e dehan, distribuisaun Cesta Bazíka hahú iha outubru to’o dezenbru tinan ne’e no iha posibilidade bele hanaruk tempu hodi konklui fahe ai-han sira.

Nune’e mós, Administradór postu administrativu Metinaro, Fausto Soares Dias, relata progresu distribuisaun produtu hahú lansa iha postu ne’e iha loron  27 outubru to’o agora ema hamutuk 4.966 maka simu ona.

“Metinaro iha suku tolu ho ninia aldeia 14,  kona-ba progresu distribuisaun ai-han, aldeia neen maka konsege halo hotu ona. Tanba ne’e, ohin kontinua iha aldeia Rai-Mean no Manuleu,” nia informa.

Metinaro ho totál populasaun 764.000 maka sei befenefisia programa Cesta Bázika.

Programa ne’e fixa membru idaidak agregadu familiár sei hetan ai-han ka voucher ne’ebé bele troka ho sasán valór $25, ne’ebé sei hetan durante fulan-rua.

Jornalista: Nelson de Sousa

Editora: Julia Chatarina

HAKEREK NO HATÁN

Please enter your comment!
Please enter your name here