Xefe Gabinete Interinu Sekretáriu Estadu Terras no Propriedade, Hilário Gusmão Fraga, halo despaxu ba pesoál finansa hodi utiliza patrimóniu Estadu matrikula G ba loron Finadu. Imajen/foti hosi Pajina Facabook CAC

DILI, 05 novembru 2020 (TATOLI)-Sekretáriu Estadu Terras no Propriedade (SETP), Mário Ximenes, rekoñese sira-nia Xefe Gabinete Interinu hasai despaxu ba pesoál  funsionáriu balun  hodi utiliza motor Estadu ne’ebé pertense ba instituisaun ne’e nian  iha  ámbitu loron feriadu finadu no motor refere hetan ona prende hosi ekipa konjunta foin lalais.

Sekretáriu Estadu Terras no Propriedade, Mário Ximenes. Imajen Tatoli/Egas Cristovão

“Tuir relatóriu ne’ebé iha serteza iha motor rua mak Xefe Gabinete relata mai hau  so presiza klarifika no konsidera katak konteúdu hosi karta Xefe Gabinete ne’e mak laloos tuir loloos autorizasaun ba kari ai-funan, maibé iha ne’ebá tau fali orden servisu fó sai iha loron feriadu ho ida ne’e mak erru iha uitoan,”  Sekretáriu Estadu Mário Ximenes hodi responde Agência Tatoli, ohin, iha nia kna’ar fatin, Colmera, Dili.

Nia dehan, motorizada refere antes ne’e kondisaun aat labele hadi’a tanba ne’e funsionáriu sira balun iha diresaun SEPT nian mai servisu loron-loron sa’e mikrolete  nune’e sira-nia parte  hadi’a hodi utiliza.

“Haree ba razaun ne’e mak Xefe Gabinete autoriza laiha intensaun ba buat seluk, tanba ne’e utilizasaun ba loron baibain tula família ba paseiu iha tasi-ibun ho festa, hanoin ida-ne’e ita labele tolera, maibé loron matebian kari ai-funan ida ne’e hanesan kostume Timor nian  lei fó dalan ka la’e,” Mário Ximenes hateten.

Ekipa Fiskalizasaun Konjunta (EFK) kompostu hosi Polísia Nasionál Timor Leste (PNTL), Diresaun  Nasionál Transporte no Terrestre (DNTT), Ministériu Finansa (Patrimóniu Estadu), Komisaun  Funsaun  Públika (CFP) no Komisaun Anti-Korrupsaun (CAC) prende karreta ho motor matrikula G hamutuk 20 hosi funsionáriu públiku sira ne’ebé  ba pasa ferias loron finadu ho karreta matrikula G ka GA.

Nota komunikadu imprensa hosi CAC ne’ebé Agência Tatoli asesu, kuarta ne’e, informa, patrimóniu Estadu ne’ebé PNTL no EFK prende durante ferias finadu kompostu hosi motorizada 18 no karreta rua (2). Númeru infrasaun hirak ne’e akontese iha Munisípiu Dili no seidauk inklui infrasaun sira akontese iha munisípiu 11 seluk no Rejiaun Administrativu Oe-Cusse Ambeno (RAEOA).

EFK nota iha infrasaun maka Xefe Gabinete Interinu Sekretáriu Estadu Terras no Propriedade, Hilário Gusmão Fraga, halo despaxu ba pesoál  finansa  hodi utiliza patrimóniu Estadu matrikula G ba festeja Finadu.

“Aktu irregularidade administrativu ida ne’e totalmente kontráriu ho apela EFK nian ne’ebé fó sai iha fulan outubru liubá,” sita nota komunikadu  CAC nian ne’e.

Nota komunikadu ne’e mós haktuir, ba aktu ida ne’e, EFK sei bolu Xefe Lojístika Sekretáriu Estadu Terras no  Propriedade nian, inklui Sekretáriu Estadu Mario Ximenes rasik atu mai halo justifikasaun ba despaxu Xefe Gabinete Interinu nian.

Karreta no motor matrikula G hirak ne’ebé tama infrasaun iha EFK nian operasaun durante ferias finadu nian sei prosesa administrativa no kriminál ba infratór sira.

Karreta no motor hirak ne’e EFK sei la entrega hikas ba iha funsionáriu utilizadór kada Ministériu no Sekretáriu Estadu sira hafoin selu koima ka multa, maibé sei entrega ba iha Patrimóniu Estadu iha Ministériu Finansas.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here