Ekipa Futeból feminina hosi TATOLI.IP (tuur) foto hamutuk ho ekipa Telemor (hamriik). Imajen/Tatoli

DILI, 04 novembru 2020 (TATOLI) – Ekipa futeból salaun (Futsal) feminina TATOLI. IP susesu halakon nia adversáriu Telemor ho rezultadu 3-0 iha torneiu futsal Ministériu Asuntu Parlamentár no Komunikasaun Sosiál (MAPKOMS) ne’ebé hala’o, ohin, iha kampu futsal, Bebora Dili.

Notísia Relevate : TATOLI “vence” SEKoop 3-1

Jogu primeira parte hahú ekipa rua halo kedan kontra ho atake. Maibé ekipa TATOLI domina bola hodi halo presaun maka’as ba Telemor.

Hosi presaun hirak ne’ebé ekipa TATOLI halo la hela de’it hanesan presaun, maibé hatudu rezultadu tanba jogadora Maria Auxiliadora (7) uza oportunidade bola barullu hodi marka golu da-uluk 1-0.

Jogu sai manas liután bainhira ekipa Telemor koko hadeer halo presaun hasoru TATOLI, maibé la rezulta golu to’o árbitru huu apitu naruk hodi fó sinál termina jogu primeira parte.

Hakat ba segunda parte jogu sai manas liután hetan suporta yel-yel hosi adeptu sira. Maibé  sorte di’ak kontinua pertense ba TATOLI  tanba Felicidade Ximenes (9)  hetan oportunidade hodi les tan golu ida hodi lori rezultadu hatuur  ba 2-0.

Rezultadu dook ona. Ekipa TATOLI nafatin domina bola iha kampu laran hodi halo jogadora Telemor sira halai sala to’o la fura rede TATOLI nian. Hosi domina iha kampu laran jogadora Maria  halo tan golu ida hodi lori score sa’e ba 3-0.

Hosi golu ne’e mak termina jogu entre ekipa rua to’o árbitru huu apitu naruk termina jogu no vitória monu ba TATOLI no Telemor pasiénsia tenke  simu derrota.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here