Ekipa futeból feminina TATOLI.IP (hamrik) foto ho ekipa SEKoop (tuur). Imajen/Tatoli

DILI, 28 outubru 2020 (TATOLI) – Ekipa femininu Agência TATOLI, IP susesu “vence” nia adversáriu Sekretáriu Estadu Kooperativa (SEKoop) ho rezultadu 3-1 iha jogu torneiu futeból salaun (futsal)  Ministériu Asuntu Parlamentár no Komunikasaun Sosiál (MAPKOMS).

Notísia Relevante : MOP feminina manan Telemor 1-0

Jogu ne’ebé hala’o iha kampu multi funsaun iha Bebora, Dili, ohin, ekipa rua konsege hatudu sira-nia jogu kapás ho espíritu “fair play” maibe ekipa feminina TATOLI.IP nian maioria jornalista domina liu bola halo presaun maka’as ba ekipa SEKoop.

Hosi presaun hirak ne’ebé ekipa TATOLI.IP halo la hela de’it hanesan presaun, maibé lori rezultadu liuhosi jogadora Maria Auxiliadora Freitas (7) uza oportunidade bola barullu hodi marka kedan golu da-uluk hodi muda rezultadu ba 1-0. Hosi rezultadu ne’e hasae liu tan vontade jogadora TATOLI.IP nian ne’ebé mak apoiu másimu hosi adeptu TATOLI nian rasik.

Jogu manas liután bainhira ekipa SEKoop kontinua halo presaun, maibé la rezulta golu. Nune’e, Jogadora TATOLI Celestina Meneses (10) uza oportunidade mamuk iha oin lansa tan golu ida hodi hadook score ba 2-1.

Maski score 2-0 ona, maibé la sai kestaun ba ekipa SEKoop hodi ho esforsu to’o ikus jogadora Zeverina (10) hosi SEKoop responde golu ida hodi muda score ba 2-1.

Jogu sai manas liután tanba hetan apresiasaun basa-liman yel-yel hosi adeptu sira. Maibé Dewi Fortuna pertense ba ekipa TATOLI.IP tanba Celestina Meneses (10) kontinua les tan golu ida hodi lori rezultadu hatuur 3-1.

Hosi golu ne’e mak termina jogu entre ekipa rua to’o árbitru huu ápitu naruk hodi termina jogu no vitória monu ba TATOLI.IP no SEKoop pasiénsia tenke simu “premiu” derrota.

Treinadór TATOLI.IP, Bernardo Xavier hateten, kontente bele lori ekipa feminina TATOLI manan ekipa SEKoop.

“Ha’u orgullu no kontente bele manan. Ba oin, ha’u fiar ami sei manan tan hodi hakat ba faze tuir mai,” Bernardo hateten.

Jornalista   : Hortencio Sanchez

Editór         : Francisco Simões

HAKEREK NO HATÁN

Please enter your comment!
Please enter your name here