Atividade ezersísiu Cobra20-2 F-FDTL. Imajen/Mídia F-FDTL

DILI, 04 novembru 2020 (TATOLI)–Iha tinan foun 2021, Komandu FALINTIL-Forsa Defeza Timor-Leste (F-FDTL) sei monta postu militár F-FDTL nian iha Suku Nunira, Postu Administrativu Laga, Munisípiu Baucau.

Notísia Relevante : Ezersísiu “Cobra20-2” orienta forsa haklaken dame

Xefe Estadu Maiór Jerál F-FDTL, Majór Jenerál Lere Anan Timur, hateten postu ne’e harii hodi reforsa seguransa ho PNTL atu kontrola grupu organizasaun arte marsiál sira labele kria beibeik konflitu sunu uma populasaun sira nian hodi halo povu moris mukit no terus beibeik.

Komandante F-FDTL ne’e dehan, tuir loloos la iha nesesidade atu tau postu militár iha Laga, tanba komandu PNTL koloka ona Ofisial Polisiamentu Komunitáriu (KPK) ba suku ida atu garante seguransa no estabilidade, maibé ho númeru efetivu PNTL ne’ebé natoon, tanba ne’e F-FDTL fó apoiu seguransa hamutuk ho PNTL.

“Fronteira ho Baguai, fronteira ho Luru, Laivai no Baucau, ita la iha nesesidade atu tau militár, tanba ita iha OPS, maibé númeru polísia ki’ik, ita koloka iha fatin hotu-hotu, tanba ha’u sei koordena ho komandu Jerál PNTL atu koloka membru efetivu natoon iha área ne’e la’ós permanente, maibé temporariamante atu bele hakbesik ba ita nia komunidade, joven sira hodi haree sira nia situasaun atu hamenus no hatún sira-nia ta’uk,” Lere  hateten liuhosi nota komunikadu imprensa ne’ebé Agência Tatoli asesu hosi Komandu F-FDTL, ohin.

Komandante F-FDTL ne’e hatutan, baihira postu seguransa ne’e harii tiha mak, membru Grupu Arte Marsiál sira hamosu beibeik konflitu, F-FDTL no PNTL sei la tolera.

“Atu kontrola seguransa no estabilidade rai-laran ita labele konta de’it PNTL ho F-FDTL, maibé konta mós esforsu kontribuisaun hosi ita nia komunidade, joven feto-mane no ferik ho katuas sira tenke kontribui ba estabilidade, tanba funu hotu ona,” nia hateten.

Lere hatutan, uluk iha tempu Indonézia, luta durante tinan 24 nia laran povu lamenta ho prezensa invazór iha Timor-Leste hodi dadur povu ,baku ema no oho povu, maibé agora Timor-Leste ukun aan ona, povu labele moris ta’uk beibeik.

Desizaun atu harii postu seguransa ne’e hetan reasaun pozitivu hosi Xefe Suku Nunira, Nilton de Souza Gama. Nia agradese tebes esforsu F-FDTL no PNTL nian atu foku seguransa iha nia suku laran.

“Ami nia hakarak atu militár sira labele atu halo ezersísiu de’it mak mai iha fatin ida ne’e, maibé ami hakarak tinan oin bele tau postu militár ida iha ami nia postu atu bele garante seguransa ba komunidade,” nia hateten.

Xefe Suku Nilton hatutan, durante tinan-10 Timor-Leste ukun aan foin primeira vés maka Komandu F-FDTL halo atividade ezersísiu Cobra20-2 no halo atividade oin-oin hodi anima povu.

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here