Xefe Estadu Maiór Jerál FALINTIL-Forsa Defeza Timor- Leste (F-FDTL), Majór Jenerál Lere Anan Timur no Prezidente Autoridade Munisípiu Baucau, António Guterres, fahe ai-han ba povu suku 10 iha Postu Administrativu Laga, Munisípiu Baucau. Imajen/Mídia F-FDTL

DILI, 04 novembru 2020 (TATOLI)- Komandu FALINTIL-Forsa Defeza Timor-Leste liuhosi ekipa ezersísiu Cobra20-2 2020 fó apoiu ai-han hanesan foos saka 400 ba komunidade kbiit laek iha suku 10 ne’ebé identifika merese atu hetan apoiu ai-han.

Notísia Relevante : Komandu F-FDTL sei monta postu militár iha Laga

Komunidade suku 10 ne’ebé hetan apoiu foos ne’e, kompostu hosi komunidade Postu Administrativu Laga ho suku ualu (8) hanesan, Atelari, Libagua, Nunira, Saelari, Sagadate, Samalari, Soba no Tequinaumata.

Iha  Postu Administrativu Quelicai, kompostu hosi komunidade suku rua, hanesan Abafala no Namanei.

Apoiu foos hirak ne’e entrega  direita hosi Xefe Estadu Maiór Jerál FALINTIL-Forsa Defeza Timor- Leste (F-FDTL), Majór Jenerál Lere Anan Timur no komandante sira akompaña hosi Prezidente Autoridade Munisípiu Baucau, António Guterres.

Liuhosi nota komunikadu imprensa ne’ebé Agência Tatoli asesu ohin hosi Komandu Jenerál F-FDTL, Majór Jenerál Lere Anan Timur hateten, apoiu ne’e la’ós tanba povu sofre hamlaha maka F-FDTL fó, maibé hanesan ajuda umanitáriu atu tulun povu kbiit laek.

“Ami fó apoiu ba imi la’ós atu han tinan tomak, maibé fó ba imi aban hotu ona, tanba ne’e imi labele halerik fali hamlaha mai ami tanba ida ne’e ami nia programa ezersísiu Cobra20-2.Hha’u fiar katak Timor ne’e la hamlaha, ema ne’ebé hamlaha entaun nia baruk ten,” Lere hateten.

Lere dehan, apoiu ne’e nia valór hanesan mós asaun solidariedade ne’ebé Lider Karizmátiku, Kay Rala Xanana Gusmão no Premiadu Nobel da Paz, José Ramos Horta hala’o perkore Timor-Leste hodi hatudu sira nia domin no solidariedade ba povu durante periodu COVID-19.

“Imi rona no haree iha televizaun Avó Xanana ho Avó Ramos Horta la’o hale’u Timor laran hodi fahe hahán ba sira ne’ebé hamlaha, tanba ne’e ami militár la tama iha programa ida ne’e, maibé ami militár programa ketak, hanesan atividade programa ba ezersísiu militár buka ajuda mós ita nia povu,” Lere hateten.

Lere dehan, povu ne’e la presiza ai-han, importante liu maka ema hotu-hotu tan Komandu F-FDTL halo ezersísiu Cobra20-2 fó apoiu ai-han inklui fó konsulta jerál ba povu nia saúde no halo animasaun desportu ba juventude feto-mane no organiza juventude ka grupu Organizasaun Arte Marsiál sira kria dame hodi kuda domin ba malu.

Iha fatin hanesan Prezidente Autoridade Munisípiu Baucau, António Guterres hato’o agradese boot Komandu F-FDTL ne’ebé implementa ezersísiu Cobra20-2 hodi ajuda povu sira.

“Ha’u hato’o agradese ba militár sira hotu. Ida ne’e hatudu sentidu ida katak povu mak forsa no forsa mak povu, uluk iha funu hatete katak FALINTIL  mak ikan, povu mak bee. Tanba ne’e ikan mak forsa, no bee mak povu, hodi transforma ho situasaun ida amizade no armonia entre forsa armadas no populasaun iha fatin ida ne’e,” António Guterres hateten.

Nia konsidera, atividade apoiu umanitáriu no atividade treinamentu táktika ne’ebé militár sira halo ho objetivu atu lori FALINTIL hakbesik ba povu bele manan konfiansa servisu hamutuk garante estabilidade seguransa iha rai laran.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here