Portavós PNTL Superintendente Xefe, Arnaldo de Araújo. Imajen Tatoli/Eugénio Pereira

DILI, 04 novembru 2020 (TATOLI)- Durante loron finadu, husu loron 1 to’o  loron 2 novembru 2020, Komandu Jerál Polísia Nasionál Timor-Leste (PNTL) rejista kazu tentativa omisídiu ne’ebé akontese iha territóriu Timor-Leste hodi hakanek vítima na’in-neen.

Notísia Relevante : DNTSR halo apreensaun motorizada Estadu no privadu 69 ho karreta tolu

Relatóriu ne’ebé Komandu Jerál PNTL rekolla hosi eskuadra polísia Aileu katak, iha Aldeia Quirilelo, Suku Liurai, Postu Administrativu Aileu, Munisípiu Aileu,  rejista suspeitu mane ida ho inisiál JS, tinan 21, taa kanek vítima feto na’in-tolu.

Portavós Komandu Jerál PNTL, Superintendente Xefe, Arnaldo de Araújo dehan kazu ne’e akontese kauza hafoin vítima sira ba partisipa serimónia kazamentu ida ne’ebé suspeitu JS nia maun rasik maka halo serimónia festa kazamentu nian.

“Vítima sira nu’udar inan no oan ne’ebé suspeitu taa kanek iha sira nia ulun, hafoin suspeitu nia inan maka konvida sira hodi ba ajuda fase bikan iha serimónia festa kazamentu ida,” portavós PNTL, Superintendente Xefe, Arnaldo de Araújo, informa ba jornalista, ohin, iha Komandu Jerál PNTL, Caicoli, Dili.

Hafoin akontese, PNTL Aileu detein kedas suspeitu JS hodi halo investigasaun durante oras 72 no aprezenta ona kazu ne’e ba Ministériu Públiku.

PNTL rejista mós kazu ema deskoñesidu taa kanek vítima Florindo Martins, tinan 30, iha área Airema, Suku Estadu, Postu Administrativu Lefeho, Munisípiu Ermera ne’ebé rezulta vítima nia kotuk sofre kanek maka’as.

Daudaun ne’e, PNTL Ermera sei buka tuir suspeitu deskoñesidu ne’ebé taa kanek vítima bainhira hamutuk ho família sira lori ai-funan ba rate maka hetan ataka derrepente.

Iha Postu Administrativu Hatulia Vila, PNTL rejista mós kazu joven ida ho inisiál BS baku ajente PNTL ho inisiál LTA sofre kanek iha kotuk, bainhira halo atuasaun ba konfrontasaun entre grupu família rua.

Iha tempu hanesan, PNTL Baucau rejista mós kazu konfrontasaun entre grupu juventude sira rezulta joven balun kanek kaman no suspeitu juventude na’in-tolu ne’ebé halo problema PNTL halo kedas detensaun.

Portavós Komandu Jerál PNTL, Superintendente Xefe, Arnaldo mós louva maturidade povu Timor-Leste koopera ho PNTL hodi garante seguransa iha Dili to’o munisípiu sira la’o di’ak.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here