Motorizada privadu no Estadu nian hamutuk 69 ne'ebé Polísia halo apreensaun. Imajen Tatoli/Eugénio Pereira

DILI, 04 novembru 2020 (TATOLI)- Durante loron 30 outubru to’o loron 4 novembru 2020, Komandu Polísia Nasionál Timor-Leste (PNTL) liuhosi Departamentu Nasionál Tránzitu no Seguransa Rodoviária (DNTSR) servisu hamutuk ho Komisaun Anti-Korrupsaun (CAC), Diresaun Nasionál Patrimóniu Estadu (DNPE), Diresaun Nasionál Transporte no Terrestre (DNTT) halo apreensaun ba motorizada privadu no Estadu nian hamutuk 69 ho karreta tolu.

Notísia Relevante : Durante finadu, PNTL Baucau rejista kazu ualu

Motór 69 ne’e kompostu hosi motór Estadu nian ho matrikula G k GA hamutuk 19, motór privadu 49 no karreta Estadu rua (2) ho karreta privadu ida (1).

Motorizada sira ne’ebé polísia halo apreensaun. Imajen Tatoli/Eugénio Pereira

“Ami prende karreta Estadu hamutuk rua, la justifika dokumentu autorizasaun viajen nian no karreta privadu ida, tanba nia na’in ne’e lanu no motorizada hamutuk 49 kompostu hosi motór Estadu nian 19,” Komandante Polísia Departamentu Nasionál Tránzitu no Seguransa Rodoviária (DNTSR) Superintendente, João Belo dos Reis, informa ba jornalista, ohin, iha Komandu Jerál PNTL, Caicoli, Dili.

Karreta no motór Estadu ne’ebé hetan apreensaun, nia hatutan, parte PNTL sei koordena ho CAC fó tiha karta autorizasaun foin infratór sira ba motorizada no karreta Estadu hirak ne’e hodi ba foti fila fali billete infrasaun iha PNTL hodi ba selu tiha multa foin foti transporte hirak ne’e.

Nia esplika tan, ba transporte privadu, ne’ebé halo apreensaun, PNTL sei aplika mós prosesu selu multa tuir infrasaun ne’ebé PNTL deteta iha terrenu.

Durante halo operasaun konjunta, ekipa deteta, maioria transporte hirak ne’e iha dokumentu, karta kondusaun laiha, inklui infratór balun sa’e motór la uza kapasete.

Operasaun ne’e, Komandu PNTL halo mós iha munisípiu 12 hodi evita asidente tráfegu no eduka sidadaun uza transporte atu kumpre regra lei tránzitu nian.

Durante loron finadu, PNTL rejista mós kazu asidente tráfegu ne’ebé akontese iha loron 1novembru iha Aileu rezulta motór ida monu halo vítima ida kanek todan no ida kanek kaman kauza hosi velosidade.

Daudaun ne’e, parte PNTL liuhosi DNTSR sei rekolla mós dadus hosi parte PNTL munisípiu 12 hodi fó sai relatóriu iha tempu besik.

Komandante Jerál PNTL, Komisáriu Faustino da Costa, halo observasaun direita ba karreta Estadu no motor Estadu nian inklui motorizada privadu hirak ne’ebé PNTL halo apreensaun. Imajen Tatoli/Eugénio Pereira

Komandante Jerál PNTL, Komisáriu Faustino da Costa, ohin, hala’o vizita hodi halo observasaun direita ba karreta Estadu no motor Estadu nian inklui motorizada privadu hirak ne’ebé PNTL halo apreensaun.

Iha vizita ne’e, Komisáriu Faustino dezafia parte DNTSR atu koordena nafatin hodi instituisaun Estadu hodi halo operasaun kada semana ba transporte Estadu no transporte públiku sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here