Komandante Polísia Munisípiu Baucau, Superintendente Xefe, Armando Monteiro. Imajen Tatoli/Eugénio Pereira

BAUCAU, 04 outubru 2020 (TATOLI)-Iha ámbitu feriadu loron finadu nian, Polísia Nasional Timor-Leste (PNTL) Munisípiu Baucau rejista kazu ualu (8) ne’ebé iha relasaun ho kazu simples tanba kauza hosi hemu-tua to’o lanu.

“Iha loron finadu,  ami rejista kazu ualu ne’ebé akontese iha area jurisdisaun Baucau no kazu  simples sira  ne’e maioria akontese tanba família sira hemu tua-lanu mak iha diskusaun no ideia  lahanesan hodi rezulta problema,”  informa Komandante PNTL, Munisípiu Baucau, Superintendente Xefe Armando Monteiro ba Agência Tatoli iha nia servisu fatin iha eskuadra Polísia Baucau, tersa ne’e.

Armando Monteiro, informa, ekipa operasaun konjunta  hosi Komandu PNTL Munisípiu Baucau ho FALINTIL-Forsa Defeza Timor-Leste (F-FDTL) halo mós operasaun konjunta iha ámbitu feriadu finadu nian hodi asegura paz no hakmatek iha fatin hotuhotu.

“Situasaun  seguransa enjeral  iha  Baucau iha finadu la’o hakmatek,” Armando Monteiro hateten.

Rejista kazu 200-resin

Iha biban ne’e, Armando Monteiro mós informa, hosi kona-ba estatístika kazu ne’ebé akontese hosi  janeiru to’o  outubru, tinan ne’e, polísia rejista kazu 200-resin no  iha kazu ofensa ho violénsia doméstika maka  ho númeru aas no arte marsiál ho seluk tan ho númeru ki’ik.

“Tuir investigasaun motivu hosi kazu ne’e maioria utilizasaun mídia sosiál sala hosi fen no la’en, nune’e akontese problema,” hateten Armando Monteiro.

Prosesu kazu sira ne’e ba ona  Ministériu Públiku (MP) nu’udar na’in ba  asaun penál hodi bele hala’o prosesu tuir dalan legal.

Komandu PNTL iha membru efetivu na’in 200-resin ne’ebé koloka iha Postu Administrativu neen hodi asegura paz no trankulidade nune’e  populasaun ida-idak bele hala’o nia atividade ho hakmatek no livre.

Ekipa operasaun konjunta kompostu hosi Komandu Polísia Nasionál Timor-Leste (PNTL) Munisípiu Baucau no FALINTIL-Forsa Defeza Timor-Leste (F-FDTL)  ba sirkulasaun transporte públiku  iha ámbitu loron finadu iha area jurisdisaun Munisípiu Baucau  atu halo prevensaun ba asidente tráfegu.

Superintendente Xefe Armando Monteiro, hateten, operasaun hala’o bazeia ba sirkulár komandu nian atu halo operasaun rutina durante loron finadu to’o kuarta ne’e.

Iha operasaun konjunta ba transporte sira ne’e, hodi haree ba dokumentu viatura, karta kondusaun no kapasidade transporte tula pasajeiru ho seluk tan.

“Operasaun ne’e atu halo prevensaun ba asidente  tráfegu tanba durante iha tempu finadu sirkulasaun transporte maka’as tebes,’’ Armando hateten.

Nia parte la informa detallu númeru infratór sira tanba sei hein relatóriu no sei relata ba Komandu Jerál PNTL mak sei pronunsia ba públiku liuhosi konferénsia imprensa.

Jornalista: Nelson de Sousa  

Editór: Francisco Simões

HAKEREK NO HATÁN

Please enter your comment!
Please enter your name here