DILI, 30 outubru 2020 (TATOLI) –Padre Parókia Sagrado Coracação de Jesus, Becora, Dioseze Dili, Amu Domingos da Silva “Maubere” hamutuk ho sarani balun, ne’ebé maioria idade labarik, ohin, halibur-malu iha resintu Tribunal Distritál Dili (TDD) hodi reza tersu no halo orasaun husu Nai Maromak Nia tulun loke Juiz sira-nia neon no matenek tesi-lia iha Tribunál ho loloos no momoos.
Prezensa Amu Domingos “Maubere” ho sarani Becora balun nian iha TDD lori ho krús fisku natoon ida (Jesus hedi no mate iha krús) no kesi mós spanduk mutin ida ne’ebé hakerek ho letra mean “AMU ARCEBISPO SALA SAIDA?, DEFENDE LIA-LOOS NE’E KNAR KREDA NIAN…. AMI LA SIMU LORI AMU BISPU MAI TIRUNÁL HANESAN KRIMINOZU..”
Hamulak, harohan, reza no hananu iha TDD ne’ebé mobiliza hosi Amu Domingos Maubere ne’e hodi hatudu sira-nia solidariedade no apoia la iha rezerva ba Arsebispu ba Arquidioseze Dili, Mgr. Virgílio do Carmo da Silva, SDB ho nia saseluk Amu Hermínio Gonçalves, eis diretór Justisa no Paz Dioseze Dili ho lider karizmátiku Kay Rala Xanana Gusmão, ne’ebé TDD notifika presta deklarasaun iha Tribunal.
Ho ókulu-metan no hatais kamiza verde, Xanana tuur nonook iha labarik sira-leet hodi rona no akompaña orasaun, reza tersu no hamulak sira ne’ebé Amu Domingos Maubere prezide.
“Ita reza no husu ba Maromak atu haraik matenek no laran badinas ba ita-nia makaer justisa sira, liuliu ita-nia juiz sira atu tesi-lia iha Tribunal ho loloos ba tuir lia-loos,” Amu Domingos Maubere hamulak iha nia orasaun.
Iha reza tersu ne’e mós akompaña ho hananu ba Nai no sarani-sira ho Amu Domingos Maubere mós hananu kántiku “Requem”, kántiku ne’ebé baibain hananu iha misa requem ba matebian sira ka ba ema mate-sira.
Tribunál hato’o karta notifikasaun ne’e ba Don Virgílio, Xanana no Amu Hermínio, hodi sai sasin no hatán ba prokurasaun ne’ebé hatama hosi konsultoria jurídiku JU,S (Juridico-Social,Consultoria) kona-ba relatóriu investigasaun ne’ebé halo hosi Komisaun Justisa no Paz relasiona ho kazu labarik na’in-30 ne’ebé sai vítima ba Padre estranjeiru ida nia hahalok ne’ebé akontese iha enklave Oeccusi.
Amu Domingos Maubere hateten, Igreja lamenta tebes, bainhira Igreja defende lia-loos no defende direitu labarik sira nian tenke ba hatán fali iha Tribunál.
Hafoin reza tersu, Amu Domingos Maubere hamutuk ho sarani sira hakilar yel-yel hodi fó viva ba Igreja Katólika.
Jornalista : Eugénio Pereira
Editór : Francisco Simões
Se situasaun hanesan nee, la iha kestaun. Tamba kenteudu husi presenza amu bispo nian hesan sasin. Sasin signfika fo informasaun besaia ba faktus nb iha no tuir perguntas zuis sira nian. So keta buka sensai deit, tamba kazu nb akontese presija intervensi tribunal nian. Vatikano deit agora tolera ona tribunal no ema hotu atu keisa hahalok at (viola seksual) nb nai lulik sira halo. Nusa Timor Leste sei dukur?