Sekretáriu Konsellu Suku Seloi-kraik, Silvestre Pinto Monteiro. Imajen/Julião “Abekha Raihusar” de Andrade.

AILEU, 29 outubru 2020 (TATOLI)—Sekretáriu Konsellu Suku Seloi-kraik, Silvestre Pinto Monteiro, hateten Populasaun Aldeia Hlalameta ho Tabulasi, Suku Seloi-Kraik, Postu Administrativu Aileu Vila, Munisípiu Aileu, to’o agora seidauk asesu eletresidade tanba iha dezentendimentu entre veteranu sira iha suku laran.

Notisia Relevante: COVID-19 halo Supermerkadu Kmanek “abandona” agrikultór Seloi-Kraik

“To’o agora ita-nia aldeia rua hanesan Aldeia Hlalameta ho Tabulasi mak eletresidade seidauk tama tanba ho razaun katak dezentendimentu entre veteranu iha suku laran hodi eletresidade la tama,”  Sekretáriu Konsellu Suku Seloi-kraik, Silvestre Pinto Monteiro, hatete ba jornalista Agência TATOLI iha nia knaar fatin sede Seloi-Kraik, foin lalais ne’e.

Nia haktuir, iha tinan kotuk (2019) kompañia ida mak lori ona besi-riin no tau ona iha aldeia rua ne’e maibé labele kontinua tanba tuir informasaun katak Governu mak tenke halo planu no foti desizaun mak halo konstrusaun ba eletresidade liuhosi kompañia ne’ebé manan tenderizasaun.

“Maibé kompañia ne’ebé lori besi-riin ne’e tuir ezejénsia populasaun nian tanba ne’e kompañia hakarak konstrui hodi fó naroman ba ema maibé Governu kansela tiha,” nia hatete.

Tanba ne’e, nia husu ba VIII Governu Konstitusionál atu iha tinan 2021 ne’e tenke investe orsamentu ne’ebé adekuadu ba setór agrikultura hodi fó benefisíu ba povu agrikultór sira iha área rurál.

“Hanesan autoridade lokál no mós hanesan ema agrikultór fó sujestaun katak povu vota ona no fó fiar ba na’in ulun sira no OJE 2020 mós pasa ona. Ho ne’e, ami iha esperansa katak VIII Governu nafatin kria unidade hodi OJE 2021 bele pasa, nune’e investe ba iha setór agrikultura tenke di’ak no fó benefisíu ba povu agrikultór sira,” nia dehan.

Ba asuntu ida-ne’e, nia hateten, ukun-na’in sira tenke no presiza duni tau ema ne’ebé loos iha fatin ne’ebé loos, nune’e ema sira-ne’e bele halo investimentu ba setór agrikultura ne’e iha duni valór no vantajén ba populasaun.

“Ami-nia esperansa ba Governu ida ne’e iha 2021 tenke halo investimentu di’ak ba povu  para bele sente ukun-aan ne’e nia benefísiu no iha duni valór no vantajén ba ami agrikultór sira iha terrenu liuliu iha área rurál sira,” nia sujere.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here