Sekretáriu Konsellu Suku Seloi-Kraik, Silvestre Pinto Monteiro. Imajen/Imajen/Julião “Abekha Raihusar” de Andrade.

AILEU, 29 outubru 2020 (TATOLI)—Sekretáriu Konsellu Suku Seloi-Kraik, Silvestre Pinto Monteiro, hateten surtu Coronavirus (COVID-19) halo Supermerkadu Kmanek la hala’o atividade hanesan baibain hodi tetu rezultadu ortikultura hosi agrikultór sira suku Seloi-Kraik Postu Aministrativu Aileu Vila, Munisípiu Aileu.

Notisia Relevante: Lalehan kakuluk laek

Situasaun ne’e halo nia triste no preokupa tanba besik tinan ida ona, agrikultór sira-nia produtu ortikultura la folin no labele hetan osan tanba Supermerkadu Kmanek “abandona” agrikultór sira.

“Supermerkadu Kmanek ne’ebé baibain tetu ami-nia produtu ortikultura ne’e paradu, tanba surtu COVID-19. Situasaun ne’e ami-nia agrikultór sira obrigadu tenke ba faan iha vila no Dili, tanba iha ne’e susar atu hetan osan,” Silvestre Pinto hateten ba jornalista sira iha nia kna’ar fatin Seloi-Kraik, foin lalais ne’e.

Tanba ne’e, nia husu Governu atu loke investimentu ba empreza nune’e bele investe iha setór agrikultura liuliu iha área rurál hodi fó benefísiu direta ba povu.

“Dezde Supermerkadu Kmanek la halo operasaun, too agora agrikultór sira-nia prudutu estraga de’it. Tanba ne’e, husu atu suporta no apoia nafatin sira hodi bele sustenta nesesidade loro-loron,” Silvestre husu.

Entretantu, agrikultora Anabela Tilman hateten durante períudu surtu COVID-19 nia la hetan liu rendimentu kompara ho tinan kotuk no mós produtu sira hanesan modo estraga de’it.

“COVID-19 halo ha’u-nia modo labele folin tanba Supermerkadu Kmanek mós labele mai sosa no tetu hanesan iha tinan kotuk ne’e. Ema fila-liman sira mós tauk atu la’o ba-mai hodi hola modo iha ami-nia suku,” Anabela hateten.

Nia haktuir, antes propagasaun surtu COVID-19 mosu iha Timor-Leste ne’e, sira sempre fa’an no hetan osan di’ak maibé agora ne’e susar tebes atu hetan osan hodi sustenta ba família nia moris liuliu sustenta ba ninia oan na’in-lima hodi selu eskola.

“Tinan kotuk ha’u fa’an modo kada kilograma hanesan modo-tahan ha’u hetan sentavus 0,85, baria $1,20 cent kada kilograma. Loron ida bele hetan $50. Ne’e ita kontente tebes tanba projetu Supermerkadu Kmanek hosi Dili mak mai tetu direta iha ami-nia sede suku. Agora ne’e, tempu di’ak mak  foin hetan $10 no dala-ruma la folin liu too estraga de’it,” nia dehan. 

Kmanek Supermerkadu hahú hala’o atividade negósiu ho agrikultór sira iha suku ne’e dezde tinan 2008-2020, hodi fó suporta modo oin-oin ba agrikultór sira hanesan repollu, brokoli, modo musan no bainhira kolleta Supermerkadu Kmanek tetu hodi distribui ba supermerkadu sira iha Dili.

Suku Seloi-kraik iha aldeia hamutuk sanulu (10) mak hanesan Kasamou, Lio, Kolihoho, Talifurleu, Raikoalefa, Leubraudu, Faularan, Fatumane, Hlalameta no Tabulasi ne’ebé ho nia totál populasaun hamutuk 4.042 no xefe família 894.

Jornalista: Osória Marques

Editór:  Cancio Ximenes

HAKEREK NO HATÁN

Please enter your comment!
Please enter your name here