Administradór Postu Administrativu Lequidoe, Domingos Damião. Imajen/Julião “Abekha Raihusar” de Andrade.

LEQUIDOE, 29 outubru 2020 (TATOLI)–Administradór Postu Administrativu Lequidoe, Munisípiu Aileu, Domingos Damião, hateten Timor-Leste labele dependente liubá importasaun ai-han hosi rai-liur maibé Governu tenke investe iha área agrikultura nian.

Notísia Relevante: COVID-19 halo Supermerkadu Kmanek “abandona” agrikultór Seloi-Kraik

“Ita labele dependente liubá importasaun ai-han ka modo-tahan sira hosi rai-liur maibé Governu tenke investe iha área Agrikultura nian,” Administradór Postu Administrativu Lequidoe, Domingos Damião, hatete ba jornalista sira iha nia knaar fatin Postu Administrativu Lequidoe, kinta ne’e.

Tanba ne’e, nu’udar autoridade munisipál, nia husu ba Governu presiza investe makaas iha área agrikultór atu hasa’e produsaun di’ak liután no atu la’o ba oin ne’e Governu tenke tau matan liuliu ba setór agrikultura nune’e rendimentu labele depende ba iha rai-liur.

“Ba oin, Aileu tau prioridade ba setór agrikultura atu oinsá agrikultór sira ne’e moris di’ak. Bainhira agrikultór sira hetan moris di’ak Governu mak tenke haree depois Governu tenke tau orsamentu atu suporta ita-nia agrikultór sira liuliu agrikultór sira iha área rurál,” Administradór ne’e hateten.

Nia esplika, buat ida agrikutura iha nasaun ne’ebé de’it presiza tebes tanba iha área floresta nian ka iha área kafe nian ka ortikultura nian tama hotu iha ne’ebá, tanba ne’e agrikultura ne’e importante.

“Setór agrikultór mak ladún la’o, sei fó impaktu ba ekonómia no nesesidade povu-nian. Enkuantu la investe no labele depende ba nasaun seluk nia produsaun maibé tenke tau importansia ba produsaun rai-laran nian,” nia esplika.

Aleinde ida-ne’e, nia dehan, estrada ne’ebé aat difikulta komunidade sira-nia atividade negósiu tanba problema komunidade sira lori produtu ba Dili ka Aileu ne’e susar tebes.

Tanba, nia hateten, komunidade sira-nia produtu ortikultura sira-ne’e mak sai hanesan riku atu responde ba sira-nia nesesidade moris loro-loron mak hanesan sabraka, kafe, aikameli, bani-been, no selu-seluk tan.

Nia hateten, tanba nesesidade obriga entaun estrada aat mós komunidade tenke lori ba Dili no ba Aileu, tanba hodi produtu hirak ne’e mak bele sustenta sira-nia oan nia eskola no mós nesesidade uma laran nian.

Notisia Relevante: Governu presiza halo konstrusaun ba bee-manas Lequidoe

Jornalista: Osória Marques

Editor: Cancio Ximenes

HAKEREK NO HATÁN

Please enter your comment!
Please enter your name here