Feto-faluk Lucia Amaral nia oan feto-boot, Cesaltina Amaral, ho idade tinan 13 ne’ebé dezde moris mai ho kondisaun hanesan ema ho defisiénsia hodi toba latan de’it iha toba-fatin to’o ohin loron. Imajen/Julião “Abekha Raihusar” de Andrade.

LEQUIDOE, 28 outubru 2020 (TATOLI)—Sente bá mundu ne’e lahó lalehan. Hateke ba lalehan nia kakuluk ne’ebá ne’e, mesak mamuk hosi rohan ba rohan. Lalehan kakuluk laek. Moris ne’e mós hanesan na’in no mahon laek. Maromak moris nia na’in be iha lalehan ne’ebá ne’e mós la fó moris ona ba moris ne’e rasik hodi fó moris no buka moris rasik.

Notísia Relevante: Juliana Biroki: “Ha’u nunka baruk atu kuda modo”

Ida-ne’e mak akontese ba feto-faluk Lucia Amaral ne’ebé oras ne’e moris mesak no moris hamutuk ho nia-oan na’in-haat (4) iha barak-tuan ida ne’ebé kakuluk kuak ba-mai. Iha kalan nakukun, maho-been sira turu habokon sira-nia moris. Iha loron manas, loromatan nia roman tiru borus uma-nia kakuluk ho livre hodi leno sira-nia moris be mout iha terus nia laran.

Bainhira udan monu rai, uma kakuluk be kuak ne’e hanesan paralon boot ida be udan-been suli tuir ho livre. Bainhira udan-monu rai makaas, uma laran sira-ne’e udan-been nalihun-aan nakfilak-aan sai lalubur.  

Book-aan ba sorin, udan-been nalihun tutuir. Duir-aan ba fatin maran, udan-been suli tutuir de’it. Book-aan la di’ak. Hakarak salva-aan hosi udan-been, bee ne’e hetok nakonu uma laran lori sira tuur hakdasak de’it iha bee laran. Oinsá mak bele hakat dook atu buka fatin maran, se moris iha baraka-tuan nia okos ne’e mesak ema ho defisiénsia de’it.

Jornalista sira entrevista Feto-Faluk Lucia Amaral. Imajen/Julião “Abekha Raihusar” de Andrade.

“Ha’u-nia oan iha na’in-haat (4). Na’in-tolu (3) moris ho kondisaun defisiénsia. So ha’u-nian oan na’in-ida (1) de’it mak moris normal. Ha’u-nia oan feto boot naran Cesaltina Amaral ho idade tinan 13. Oan daruak Cesaltino Amaral ho idade tinan sia (9). Oan datoluk naran Rosalina Amaral ho idade tinan hitu (7) no oan dahaat mak Augusto tinan haat (4) mak moris ho kondisaun normal,” Feto Faluk Lucia Amaral haktuir ba jornalista sira iha nia rezidénsia iha Aldeia Cairema, Suku Faturilau, Postu Administrativu Aileu Vila, Munisípiu Aileu, kuarta ne’e.

Loron ba loron no kalan nani da’et ba kalan seluk, feto faluk ne’e moris hamutuk ho nia oan na’in-haat (4) iha baraka-taun ne’e mesak de’it. Feto faluk Lucia Amaral nia laen-kaben, João Amaral, husik  hela mundu ne’e iha fulan tolu nia laran ona. Maske labarik sira-nia aman fila hikas ona ba Maromak nia uman maibé Lucia Amaral nafatin iha korajén atu moris. Ho espíritu no vontade makaas, nia servisu ho domin hodi sustenta nia oan  nain-haat (4) hodi halo toos mesa-mesak.

“Ha’u sente triste tanba labele halo buat ida hodi sustenta ha’u-nia oan sira. Loro-loron mak hamoos to’os ne’e de’it maibé tempu udan mak foin hamoos. Dala barak ne’e, família no viziñu mak suporta ai-han ba ami atu han,” Feto Faluk Lucia Amaral haktuir ho matan-been.

Feto faluk ne’e hateke ba lalehan. Nia matan-been monu suli hanesan udan-been be fakar tuun hosi lalehan. Matan-been turu no suli la para rai. Nia hateke ba jornalista sira ho oin nakraik. Nia dehan ho neineik. To’o ohin loron ne’e, Governu seidauk tau matan ba nia oan sira maibé nia nafatin esforsu aan hodi buka hahan. Moras, laiha ema ida mak tau matan. Pasiénsia! Kalan no loron, tuur hateke malu ho matan mamuk no hateke maran de’it.

“Klinika madre sira-nian iha Postu Lequidoe mak kada fulan tolu (3) fó dala ida ai-han ba ami atu han. Madre sira mak fó foos, susu-been, no sasan haris nian hanesan sabaun, rinso, eskova no pastadente  inklui ho pomada hodi kose no dada-loos labarik sira-nia ain maibé to’o agora laiha mudansa. Asosiasaun Defisiénsia Timor Leste (ADTL) eziste kleur ona maibé seidauk vizita ami hodi haree ha’u-nia oan sira-nia kondisaun. Asosiasaun ne’ebé toma konta ba ami ema ho defisiénsia sira ne’e nunka mais vizita ami-nia fatin. Maibé, ami ba HNGV Dili dala ida ona maibé dehan labele kura entaun ami fila-fali mai de’it,” Lucia Amaral haktuir ho laran triste.

Oan daruak Cesaltino Amaral ho idade tinan sia (9). /Julião “Abekha Raihusar” de Andrade.

Família uma-tahen ida, Carlos de Jesus, hateten ho onestu katak atu tau matan ba labarik na’in tolu (3) ne’e, nia inan presiza pasiénsia no korajén atu atende sira loro-loron. Tanba, labarik na’in-rua (2) ne’e difisiente ain no oan feto boot ne’e defisiénte fíziku hodi labele la’o no loron kalan mak toba latan de’it iha hadak leten de’it. Han, nia inan mak fó han. Toba, nia inan mak hatoba. Haris, nia inan mak fó haris. Soe bee-boot no bee-kiik, soe nune’e de’it no inan mesak mak bele hamatan no hamoos.

“Labarik defisiente  na’in-tolu (3) ne’e moris mai ho kondisaun defisiénsia ona. Bainhira nia inan nia knotak moras ona atu partus, haree labarik nia-matan book-aan no ikus mai sira labele la’o entaun ajuda fali ho kadeira roda hodi la’o. Agora kadeira roda aat hotu ona maibé laiha ema ida ka hosi na’in ulun ida mai fo apoiu materiál ba sira. Kondisaun ne’e liga mós ba kultura maibé família halo tuir ona maibé defisiente feto boot nia alin be tuir nia ne’e mai ho kondisaun hanesan,” nia dehan.

Atu halo no harii uma, família laiha kapasidade. Tanba ne’e, dalan di’ak liu mak  husu tulun ba Governu atu ajuda netik kalen, besi hodi halo uma ba sira na’in-haat (4) ho nia inan tanba labarik na’in-tolu (3) nia inan ne’e agora daudaun isin-rua hela.

“Labarik sira-nia inan mós labarik iha isin ka isin-rua hela. Nia faluk laiha duni forsa no kapasidade atu halo uma. Tanba, daudaun ne’e uma aat no kuak hotu ona. Maibé kona-ba ai-han, família sira bele atende. Maibé, uma ami husu ba parte relevante liuliu Ministériu Saúde ho Ministériu Solidaridade Sosiál no Inkluzaun (MSSI) inklui ho Asosiasaun Defisiénsia Timor Leste (ADTL) atu toma atensaun ba kondisaun ami família defisiénsia nian,” nia husu ho esperansa be nakonu.

Jornalista: Osória Marques

Editór: Cancio Ximenes

 

HAKEREK NO HATÁN

Please enter your comment!
Please enter your name here