Imajen/Julião “Abekha Raihusar” de Andrade.

LEQUIDOE, 29 outubru 2020 (TATOLI)—Administradór Postu Administrativu Liquidoe, Munisípiu Aileu, Domingos Damião, hateten agrikultór sira iha postu administrativu ne’e presiza formasaun tékniku kona-ba prosesu kuda no koilleta modo tanba agrikultór sira-nia koñesimentu mínimu tebes.

Notísia Relevante: Timor-Leste labele dependente ba importasaun ai-han hosi rai-liur

“Ita sei falta formasaun téknika ba ita-nia agrikultór sira. Tanba ne’e, presiza formasaun hodi hasa’e sira-nia koñesementu kona-ba kuda modo no koileta modo ne’ebé daudaun ne’e mínimu tebes,” Administradór Postu Administrativu Liquidoe, Domingo Damião, informa ba jornalista sira iha Lequidoe, kuarta ne’e.

Nia hatutan, agrikultór sira-nia koñesimentu kona-ba oinsá kuda modo ne’e menus tebes tanba estensionista ne’ebé kolokadu iha munisípiu Aileu  ne’e na’in-tolu (3) de’it entaun labele kobre fatin hotu.

“Daudaun ne’e, estensionista sira-ne’ebé koloka iha munisípiu ne’e hamutuk ema na’in-tolu (3) de’it, entaun labele kobre agrikultór sira iha suku hitu (7) ne’e,” nia fó razaun.

Tanba ne’e, administradór ne’e agradese ba jornalista sira tanba bele hakat mai to’o iha postu administrativu ne’e hodi haree direta situasaun real no fó sai situasaun loloos liuhosi mídia no bele sai hanesan referénsia ba Parlamentu Nasionál no Governu.

“Ami haksolok tanba ita-boot sira-nia prezensa iha postu ida-ne’e sei informa preokupasaun populasaun Lequidoe nian ba parte nasionál hodi konsidera mós setór agrikultór no presiza hasa’e produsaun agrikultór nian,” nia espresa.

Nia informa, populasaun Lequidoe riku ho produtu lokál sira hanesan sabraka, modo, koto, bani-been no ai-kameli.

Entretantu, Postu Administrativu Lequidoe ne’e iha suku hitu (7) mak hanesan Suku Acublitoho, Bereleu, Betulau, Fahisoi, Faturilau,  Manucassa noSuku  Namolesso.

Jornalista: Osória Marques

Editór:  Câncio Ximenes

HAKEREK NO HATÁN

Please enter your comment!
Please enter your name here