Saudozu Sebastião Gomes

DILI, 28 outubru 2020 (TATOLI)—Parlamentu Nasionál, presta omenajen ba saudozu Sebastião Gomes ne’ebé ohin halo ona tinan 29. Reprezentante povu sira hala’o menutu silénsiu hodi hanoin hikas saudozu nia kontribuisaun luta ba libertasaun nasionál povu maubere nian.

Notisia Relevante: Sebastião “Loriku Rai Na’in” La Fó Fatin Ba “Garuda”

Prezidente Parlamentu Nasionál, Deputadu Aniceto Longuinhos Guterres Lopes, konsidera loron 28 outubru importante tanba iha ligasaun forte ho masakre Santa Cruz nian.

“Ha’u konvida deputadu sira hotu mai ita hamutuk fó omenajen no onra ba ita-nia joven aswain Sebastião Gomes, joven ne’ebé barani tebes hodi saran-aan defende lialoos no defende ukun rasik-aan,” Prezidente Parlamentu Nasionál dirije ho  “menutu silénsiu ita hahú” iha plenária Parlamentu Nasionál, kuarta ne’e.

Prezidente Parlamentu Nasionál dirije menutu silénsiu ne’e hfoin Deputadu David Ximenes “Mandati” fó hanoin ba plenária katak ohin loron saudozu Sebastião Gomes nia loron mate.

“Ohin, 28 outubru 2020, uluk 28 outubru 1991, 16.00 dadeersan Sebastião Gomes mate iha Motael, ha’u husu menutu silénsiu hodi nune’e hotu-hotu bele hanoin hetan,” Deputadu Mandati fó hanoin ba plenária.

Nne’e mós Deputadu Francisco Miranda Branco, hateten loron 28 outubru 1991 mak detemina masakre 12 novembru 1991.

“Ami sente ida-ne’e mós hanesan loron istóriku ida, ita presiza rejista tanba determinante tebes iha situasaun defísil hodi rezulta asaltu ida iha Motael no rezulta ita-nia joven ne’e mate,” Xefe Bankada FRETILIN ne’e heteten.

Entretantu Deputadu Bankada FRETILIN, Marito Fatubai Mota, ne’ebé envolve mós iha akontesimentu 28 outubru 1991 NE’E haktuir iha 28 outubru 1991 iha Igereza Motael joven barak mak hasoru situasaun ameasadu no iha persegisaun.

Juventude rezisténsia ne’e konta, iha momentu ne’e sira halai buka fatin hodi salva-aan iha igreja Motael, joven sira-ne’ebé lidera rezisténsia iha tempu ne’ebá mak hanesan Aleixo Cobra, Bonifácio ema Maliana (saudozu), Julião Mausiri no sira seluk inklui matebian Sebasitião Gomes,.

Nune’e iha 27 outubru kalan intelijénsia Indonézia nian komesa hafuhu to’o meia-noite depois hodi halo atake igereja Motael madrugada iha 28 outubru hodi rezulta Sebastião Gomes mate inklui mós intelijénsia Timoroan ida mate kedas fatin iha momentu ne’ebá.

“Ha’u sei lembra katak, iha 28 outubru tuku 16.00 dadeersan, joven tomak nakonu iha igereza Motael tanba militár sira atu ba foti joven lubuk iha laran entaun iha tempu ne’ebá matebian Mário Carrascalão, amu Belo ho jenerál Indonézia ida halo hela negosiasaun oinsá atu foti joven sira iha Motael, karreta militár lubuk ida atu ataka Motael maibé ami la fó tempu atu tama iha-ne’ebá para atu hasai joven sira hosi igereza Motael,” Marito Mota esplika.

Maibé nia hatutan, maibé iha negosiasaun ne’e konsege hasai duni joven sira-ne’e no ikus mai joven sira balun lori ba kastigu iha Kupaun, balu kastigu iha Timor  no únika Julião Mausiri mak ulun-to’os lakohi kumpri hodi la halo tuir negosiasaun ne’e, ne’ebé nia konsege halai sai hosi Igereza Motael

“Tanba ne’e ha’u hanoin katak, loron ida ohin importante tebes bai ta hotu atu hanoin hikas,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here