Logotipu Telkomcel

DILI, 27 outubru 2020 (TATOLI) – Ekipa  futeból salaun  (futsal) hosi Ministériu Asuntu Parlamentár no Komunikasaun Sosiál (MAPKOMS) A, ohin lokraik, tenke derrota todan hosi ekipa adversáriu Telkomcel ne’ebé “tatidik” MAPKOMS ho golu 8-4.

Notísia Relevante : Ekipa futeból 48 partisipa torneiu futsal MAPKOMS

Torneiu futeból salaun (Futsal) MAPKOMS 2020, realiza iha kampu futsal, Bebora, Dili, hodi komemora aniversáriu proklamasaun independénsia ba dala-45 (28 novembru 1975-28 novembru 2020).

Iha jogu minutu primeiru ekipa futeból Telkomcel lansa persegisaun ho  atake  maka’as hasoru ekipa MAPKOMS A. Nune’e, halo jogadór  MAPKOMS A nian la konsege atua ho di’ak  no lakon konsentrasaun.

Ho situasaun ne’e, ekipa jogadór Telkomcel uza aproveita másimu hodi lansa golu ba rede MAPKOMS A, Gil Vicente (7) hodi muda rezultadu ba 1-0. Nune’e kontra atake manas liután hosi Telkomcel ba MAPKOMS, Amaro Pinto (12) hosi Telekomcel lansa tan golu rua tuituir malu hodi muda rezultadu ba 3-0.

Liu de’it minutu balun, Domingos Eko hosi Telkomcel lansa tan golu ida hodi “tonka” score Telekomcel nian sa’e ba 4 no MAPKOMS A mantein ho score zero (0) to’o árbitru huu apitu naruk hodi termina jogu primeira parte.

Hakat ba segunda parte, MAPKOMS A  halo mudansa hosi estratéjia jogu, ho nune’e, jogadór Damião Gusmão (3) lansa kedan golu rua tuituir malu hodi hasai rezultadu zero (0) ba 2-4.

Hosi golu rua-ne’e halo adversáriu Telkomcel nia ritmu jogu sa’e liután ho nune’e jogadór Amaro Pinto prodús tan golu 2 hodi tane score Telkomcel 6 no MAPKOMS A hela ho score 2.

Jogadór Telkomcel liuhosi Domingos Eko no Timóteo Ximenes (11) “suta” tan golu rua tuituir malu hodi hasa’e bandeira Telkomcel nian ba score 8 no MAMPKOMS A obrigadu hela ho golu 2.

Maski score dook ona la sai kestaun ba MAPKOMS A hodi esforsu an liután. Esforsu hirak ne’e la hela de’it hanesan esforsu, maibé konsege responde tan golu rua hosi jogadór Judiong F (11) no Florindo M (5) hodi halo rezultadu ba 8-4.

BNCTL vs MAPKOMS feminina 1-0

Logotipu BNCTL

Iha parte seluk, jogu entre ekipa feminina MAPKOMS kontra ekipa feminina BNCTL (Banku Nasional Komérsiu Timor-Leste) rezulta BNCTL manán ho golu úniku 1-0.

Jornalista   : Hortencio Sanchez

Editór         : Francisco Simões

HAKEREK NO HATÁN

Please enter your comment!
Please enter your name here