Ministru Asuntu Parlamentár no Komunikasaun Sosiál (MAPKOMS), Francisco Jerónimo. Imajen Tatoli/ Egas Cristóvão

DILI, 27 outubru 2020 (TATOLI) – Ekipa futeból hamutuk 48 kompostu hosi ekipa mane 29 no ekipa feminina 19 partisipa torneiu Futeból Salaun (futsal) “MAPKOMS” 2020.

Eventu ne’e hala’o hodi komemora loron Proklamasaun Independénsia RDTL ba dala-45, 28 novembru 1975- 28 novembru 2020, ho tema “futeból hanesan divertimentu desportu ba hotu, iha futeból ita promove parseira ida mútua promove komunikasaun no hametin relasaun amizade”.

Objetivu seluk hosi torneiu ne’e atu hametin mós espíritu patriotizmu nasionalizmu no hakbesik MAPKOMS ho instituisaun mídia, jornalista no entidade relevante sira hodi kesi lasu amizade no parseiru liuhosi atividade desportiva.

Eventu ne’e hanesan mós meiu komunikasaun ida atu promove paz, armonia no divertimentu iha komunidade nia leet  hodi evita asaun konflitu  no dezenvolve setór komunikasaun sosiál iha Timor-Leste.

Hosi ekipa 48 ne’e mai hosi instituisaun mídia estatál rua hanesan Tatoli.IP no RTTL,EP, media privadu sira iha timor no instituisaun Governu ho órgaun independente sira.

Jogu ne’e hala’o iha kampu multi funsaun  Bebora, Dili, loke direita hosi Ministru Asuntu Parlamentár no Komunikasaun Sosiál (MAPKOMS) Francisco Martins da Costa Pereira Jerónimo.

Iha intervensaun Ministru Francisco Martins da Costa Pereira Jerónimo hateten, atividade ne’e hala’o atu komemora loron proklamasaun 28 Novembru, maibé hanesan ezersísiu ida ba ema hotu atu book an nune’e labele hetan moras.

“Atividade ida ne’e atu hato’o mós mensajen ida mai ita atu book an loroloron hodi kuida ita nia saúde, nune’e labele hetan moras,” Ministru Francisco Jerónimo hateten.

“Atu hato’o ba ita hotu boa sorte, joga ho di’ak. Iha ne’e mai joga la’ós atu mai tebe-malu, la’ós atu mai baku-malu. Ha’u fiar ita-boot sira hosi ministériu hotu, mídia sira hotu, imi sei joga ho di’ak to’o remata,” nia hatutan.

Torneiu MAPKOMS  ne’e iha loron hahú 27 outubru no termina iha loron 27 novembru, tinan ne’e.

Iha abertura ba torneiu ne’e prienxe ho kedas ekipa futeból feminina  hosi MAPKOMS vs BNCTL.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here