Delegadu aldeia Lulei, suku Uai-mori, António Rangel. Imajen Tatoli/António Gonçalves

DILI, 27 outubru 2020 (TATOLI)–Suku Uaimori, postu administrativu Viqueque vila, munisípiu Viqueque durante ne’e seidauk asesu enerjia eletrisdade.

Tuir delegadu aldeia Lulei, suku Uai-mori, Antonio Rangel, hateten durante ne’e populasaun sira uza de’it ahi-oan iha tempu kalan, tanba ne’e nia husu parte relevante hodi tau-matan.

“Haree ba fatin seluk iha foho-lolon no la serve atu ahi eletrisidade tama mós ita haree ahi tama hotu ona maibé Uai-mori to’o agora ahi seidauk tama, ne’e ba ami triste tebes,” Antonio Rangel hateten iha edifísiu Sekretaria Estadu Kooperativa (SEKoop), Akait, tersa ne’e.

Notísia Relevante: 2021, MOP Prioritiza Suku 77 Ne’ebé Seidauk Asesu Eletrisidade

Delegadu ne’e dehan, komunidade suku preokupa ba eletrisidade, enkuantu bee-moos no kondisaun estrada daudaun ne’e iha ona empreza balun mak hadi’a.

“Desde ita ukun-an, ami seidauk sente naroman eletrisidade. Nai-ulun sira kuandu ba ami sempre husu maibé laiha resposta, atu dehan katak Uai-mori ne’e suku ida ne’ebé besik tebes ho munisípiu Baucau no Viqueque maibé tanba sa mak to’o agora ahi eletrisidade seidauk bele kobre,” nia akresenta.

Autoridade suku antes ne’e haruka ona proposta ba empreza hodi husu apoia solar panel no konsege hetan rezultadu.

“Kritéria utilizasaun solar panel ne’e to’o tinan-rua maibé realidade balun uza la to’o fulan,” nia hatutan.

Entretantu suku Uai-Mori iha aldeia neen Lulei, Mea-uai, Uaibobo, Uatulesu, Uma-bo O, no Uma-Liurai.

Antes ne’e, Ministériu Obra Públika (MOP) identifika ona suku 77 maka seidauk iha asesu ba eletrisidade no hosi númeru ne’e sei instala fazeadamente, iha tinan 2021 implementa iha suku 33, enkuantu 44 seluk iha tinan 2022.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here