Ministru Obra Públika, Salvador Eugênio Soares dos Reis Pires. Imajen Tatoli/Florêncio Miranda Ximenes

DILI, 03 jullu 2020 (TATOLI) – Governu liuhosi Ministériu Obra Públika (MOP) iha tinan 2021 ba oin hakarak prioritiza suku hamutuk 77 iha Timór laran ne’ebé seidauk asesu ba eletrisidade, liuliu suku ne’ebé besik liña elétrika ezistente.

Ministru Obra Públika, Salvador Eugênio Soares dos Reis Pires, hateten iha 2019 husi suku 77 ne’e MOP dezeña ona suku 33 ne’ebé seidauk asesu eletrisidade atubele tau iha Orsamentu Jerál Estadu (OJE) 2020 hodi hala’o konstrusaun, maibé orsamentu ne’e xumba iha Parlamentu Nasionál.

“Ita haree Orsamentu 2020 ne’e la biban ona atu implementa projetu eletrisidade iha suku 33, ne’ebé iha OJE 2021 ita bele hala’o ona projetu sira ne’e, liuliu implementa iha suku 33 no tinan oin mai mak kontinua ba restu 44 ne’e,” tenik Ministru Salvador, iha Fatuhada, sesta ne’e.

Tuir Governante ne’e, MOP prioritiza fazeadamente atu kompleta suku 77 ne’ebé seidauk asesu enerjia eletrisidade, tanba ne’e daudaun hahú halo levantamentu dadus inklui dezeñu.

Programa eletrifikasaun rurál iha 2019 prevee millaun $1 hodi halo identifikasaun ba área hirak ne’ebé izoladu ho jeografikamente halo ligasaun fíziku ba distribuisaun liña elétrika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here