Vise-Ministru Turismu, Komérsiu no Indústria, Domingos Lopes Antunes. Imajen TATOLI/Egas Cristovão

DILI, 26 outubru 2020 (TATOLI)Daudaun ne’e liña ministeriál sira hahú preparasaun ba implementasaun programa Cesta Bázika iha territóriu tomak, ne’ebé tuir planu sei realiza iha semana daruak dezembru 2020.

Tuir Vise-Ministru Turizmu, Komérsiu no Indústria, Domingos Lopes Antunes, iha implementasaun programa apoiu família ne’e, produtu ai-han sei mai hosi produsaun agríkola no operadór komersiál nasionál, ne’ebé distribuisaun ba munisípiu sira la hanesan ho kapitál Dili.

“Produtu ai-han sei tau iha bote no kaixa resiklajen atu distribui ba komunidade iha área rurál, enkuantu ba komunidade iha Dili sei uza sistema voucher, nune’e kada benefisiáriu ida-idak ba loja ne’ebé Governu indika ona atu troka ho sasán,” Vise-Ministru Domingos Lopes informa iha edifísiu Ministériu Turizmu, Komérsiu no Indústria (MTKI), iha Mandarin, segunda ne’e.

Notísia Relevante: Governu estabelese medida apoiu ba família liuhosi atribuisaun cesta bázika

Tuir planu, iha tersa (27/10), Governu sei lansa programa Cesta Bázika dahuluk iha postu administrativu Metinaro, munisípiu Dili.

Medida apoiu ne’e ho perspetiva estimulasaun ekonómiku ba kurtu prazu no iha tempu hanesan bele insentiva produsaun no komérsiu iha nível lokál no nasionál.

MTKI iha knaar atu halo distribuisaun produtu ai-han ba komunidade, enkuantu Sekretaria Estadu Ambiente (SEA) buka saku orgániku atu tau produtu.

Cesta Bázika kompoin hosi ai-han esensiál no produtu ijiene ou voucher ne’ebé korresponde ho valór sasán.

Membru ida-idak iha uma-kain ne’ebé rejista iha ona ‘Livru Rejistu Uma-Kain’ to’o 11 maiu 2020 sei sai benefisáriu ba programa Governu ne’e, ne’ebé kada ema sei hetan produtu ai-han iha embalajen ou voucher ho valór $25 ba fulan-rua (novembru no dezembru).

Implementasaun medida apoiu ba família sei lidera hosi Ministru Koordenadór ba Asuntu Ekonómiku (MKAE), ne’ebé koopera ho entidade relevante.

Ministériu Saúde (MS) sei halo validasaun ba lista produtu atu hatene ninian nutrisaun no sanitáriu hosi kada produtu ai-han.

Enkuantu, Ministériu Administrasaun Estatál (MAE) sei serbisu hamutuk ho autoridade no administrasun munisipál no suku, ba elaborasaun lista xefe família no númeru totál ba membru uma-kain ne’ebé sei sai benefisiáriu no organiza distribuisaun.

Nune’e mós, Ministériu Solidaridade Sosiál no Inkluzaun (MSSI) sei disponibiliza rede nasionál no sentru solidariedade sosiál iha munisípiu ba apoiu distribuisaun Cesta Bázika.

Antes ne’e, Prezidente Repúblika, Francisco Guterres ‘Lú Olo’ promulga ona dekretu-lei kona-ba médida apoia ba família liuhosi atribuisaun Cesta Bázika iha ámbitu rekuperasaun ekonómika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here