Xefe Bankada CNRT, Duarte Nunes. Imajen Tatoli/Egas Cristóvão

DILI, 27 outubru 2020 (TATOLI)—Bankada Congresso Nacional da Reconstrução de Timorense (CNRT) preokupada ho kazu COVID-19 ne’ebé sempre mosu molok estensaun Estadu Emerjénsia (EE) ramata.

Notisia Relevante: PN aprova estensaun Estadu Emerjénsia dahitu

Xefe Bankada CNRT, Deputadu Duarte Nunes, propoin loloos ne’e aplika Estadu Emerjénsia barak liu ba Munisípiu Bobonaro, Covalima no RAEOA.

Nia dehan, munisípiu sira seluk mós merese atensaun maibé munisípiu tolu ne’e mak merese atensaun nune’e populasaun bele hakmatek, bele kolabora autoridade sira nune’e bele hetan susesu iha kombate surtu COVID-19.

“Situasaun ne’ebé ke ami akompaña iha estensaun datoluk liubá, iha véspera (dia que imediatamente antecede aquele de que se trata) mak sempre mosu kazu moras COVID-19, atu koinsidénsia ka atu planeadu ne’e ba ami bele konsidera hanesan situasaun ida-ne’ebé ke ita bele dehan fabrikadu. Tanba, ita iha laran bele hatene realidade maibé ema kuandu rona até nasaun viziña sira dezafia atu kontrata ita-nia doutór sira ne’ebé loron haat (4) kura moras ne’ebé mosu,” Xefe Bankada CNRT, Deputadu Duarte Nunes, levanta kestaun  ne’e liuhosi plenária, Parlamentu Nasionál, tersa ne’e.

Duarte Nunes hatutan, situasaun ida-ne’e bele realidade maibé akontese véspera ne’e dala tolu ona entaun husu ba PN atu haree oinsá mak hamosu tiha lei ruma hodi ita uza ba kalamidade 

“Ida-ne’e hatudu saida. Situasaun ne’e bele realidade maibé akontese véspera ne’e dala tolu ona. Ita haree oinsá mak hamosu tiha lei ruma hodi ita uza ba kalamidade tanba nasaun seluk la uza estadu emerjénsia. Ita iha kapasidade halo lei ruma ka lae,” Xefe Bankada CNRT ne’e fó hanoin.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here