Prezidente Repúblika, Francisco Guterres ‘Lú-Olo’ hamutuk ho Prezidente Parlamentu Nasionál, Aniceto Guterres Abertura Da-Tolu Kinta Ligislatura iha Sesaun Plenária Iha Parlamentu Nasionál. iha PN. tersa (15/09). Imajen Tatoli/ Egas Cristóvão

DILI, 27 outubru 2020 (TATOLI)—Parlamentu Nasionál, ohin, aprova estensaun Estadu Emerjénsia (EE) Dahitu hodi autoriza Prezidente Repúblika, Francisco Guterres “Lú Olo”, dekreta Estadu Emerjensia ba loron 30 tán.

Notisia Relevante: Prezidente Repúblika dekreta ona estadu emerjénsia daneen

Parlamentu Nasionál aprova pedidu estensaun Estadu Emerjénsia ne’e ho rezultadu votasaun nominál a-favór 42, kontra 0, no abstensaun 0.

Entretantu, Xefe Bankada CNRT, Duarte Nunes, mós fó votu favorável ba estensaun ne’e maibé membru bankada CNRT sira maioria deside auziénsia iha votasaun ne’e.

“Ho nune’e lei autorizasaun ba renovasaun deklarasaun Estadu Emerjénsia pasa, Estadu Emerjénsia renovadu. Ita fó fiar nafatin ba Governu implementa medida adekuada sira,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, tersa ne’e.

Pedidu hosi Prezidente Repúblika, Francisco Guterres “Lú Olo”, ba renovasaun deklarasaun Estadu Emerjénsia iha territóriu nasionál tomak hahú hosi tuku 00.00 loron 04 novembru 2020 (kuarta-feira) no termina iha tuku 23.59 iha loron 03 dezembru 2020 (kinta-feira) ho parsialmente hodi suspende diretu balun tuir mai ne’e:

a. Sirkulasaun internasionál, sei estabelese kontrolu sanitáriu iha portu, aeroportu ka postu fronteira terrestre atu impede moras ne’e tama mai territóriu nasionál ka kondisiona observánsia kondisaun nesesáriu hodi evita risku propagasaun epidemia ne’e, nune’e mós toma medida nesesária asegura sirkulasaun internasionál ba bens no serbisu esensiál sira.

b. Liberdade sirkulasaun, fixasaun rezidénsia ba kualkér pontu iha territóriu nasionál sei lidera hosi autoridade públika sira hodi bele redús risku kontájiu no ezekuta medida prevensaun no kombate epidemia, inklui konfinamentu kompulsivu domisiliáriu no impozisaun saniáriu sira.

c. Direitu rezisténsia, kualkér atu (ato) rezisténsia ativa ka pasiva emanda hosi autoridade públika kona-ba ezekusaun Estadu Emerjénsia.

Reprezentante Bankada PLP, Deputadu Abel Pires, apoia tomak hodi halo estesaun EE dahitu tanba kazu COVID-19 sa’e ba millaun ida-resin tanba ne’e estensaun pertinente.

Nune’e mós, nia dehan, kazu pozitivu COVID-19 iha viziña Indonézia sa’e makaas tanba ne’e Timor-Leste tenke halo prevensaun liuhosi Estadu Emerjénsia.

“Bankada PLP apoia totalmente ba VIII Governu nia medida hotu hodi luta kontra surtu COVID-19,” Deputada Bankada PLP ne’e informa liuhosi plenária PN, tersa ne’e.

Xefe Bankada KHUNTO, Deputada Olinda Guterres, laiha objesaun no apoia estensaun deklarasaun Estadu Emerjénsia dahitu (7) ne’e.

“Ha’u hameno de’it, atu moras aat labele tama mai ne’e, aumenta saláriu ba membru PNTL no F-FDTL hodi kontrola movimentu ilegál iha fronteira. Ami Partidu KHUNTO laiha objesaun,” nia hateten.

Reprezentante bankada CNRT, Deputadu Gabriel Soares, konsidera Estadu Emerjénsia dahitu ba Timor-Leste hatudu Estadu ida-ne’e mukit tebes buka opsaun no solusaun oinsá mak bele sai hosi situasaun agora.

“Parlamentu iha kbiit polítika atu fó kondisaun ba Governu maibé Bankada Guvernu “defaktu” ida-ne’e laiha boa vontade lori PPL Protesaun Sívil mai fali iha Plenária Parlamentu Nasionál.  Ho Lei Protesaun Sívil, lei ida-ne’e sei fó kompeténsia ba Primeiru-Ministru atu foti medida no deklara Estadu de Kalamidade. Ne’e mostra uma polítika foer, Bankada Governu futu lia ho Prezidente Repúblika atu husik Lei Protesaun Sívil kaduka tiha, nune’e sira avontade hodi inventa Estadu Emerjénsia ba interese podér ne’ebé hetan hosi dalan hadau nian,” bankada CNRT hato’o nia deklarasaun polítika iha ámbitu debate estensaun EE dahitu.

Bankada CNRT konsidera polítika “astuta” ne’e hodi satisfas gánansia ba podér tanba ne’e tenke sakrifíka tiha Povu tomak nia liberdade ba sirkulasaun hodi buka moris, enkuantu konxientemente Governu husik ema hosi rai-liur livre tama mai iha territóriu Timor-Leste.

Entretantu, Xefe bankada FRETILIN, Deputadu Francisco Miranda Branco, konkorda estensaun EE dahitu no medida sira-ne’ebé VIII Governu hola ona.

“Ami fó votu favorável ba estensaun Estadu Emerjénsia ne’e tanba iha mundu tomak kontinua hasoru moras perigu ida-ne’e, hakarak louva VIII Governu Konstitusionál no instituisaun hotu-hotu,” Xefe Bankada FRETILIN ne’e fundamenta.

Reprezentante Bankada PD, Deputadu Mariano Assanami Sabino dehan, ba PD buat ne’ebé salva povu nia moris importante tebes.

“Maibé PD husu ba hotu-hotu moras ne’e la da’et no la mai ita, ita hotu agradese ba Maromak, ba ita-nia eroi sira, ba mós ita-nia uma-lisan, husu hotu-hotu reza nafatin tanba moras ne’e mosu mai, ita sei la hasoru moras ne’e. Segundu, ita laiha serteza bainhira mak moras ne’e hotu, tanba ne’e ita presiza konsolida ita-nia aan hodi hasoru krize mundiál ne’e,” Assanami hateten.

Xefe Bankada Frente-Mudança, Deputada Isabel Maria Barreto Freitas Ximenes, konsidera EE hanesan dalan únika hodi restrinje ema-nia diretu.

“Iha Europa no nasaun viziñu Indonézia númeru aumenta aas. Ho nune’e bankada Frente-Mudança husu Governu halo restrisaun iha fronteira liuliu movimentu ilegál no fó sansaun todan ba ema sira-ne’ebé dalan ilegál no fasilita ekipamentu pesoál ba autoridade defeza, defeza no fó formasaun ba ita-nia médiku hodi halo atendimentu públiku ho di’akliu. Tanba ne’e, ami fó votu favorálvel ba estensaun EE ne’e,” nia katak

Xefe Bankada UDT, Deputadu Francisco David Xavier Carlos, husu Governu sensibilizasaun moras ne’e ba povu nune’e povu bele halo prevensaun.

Xefe Bankada PUDD, Deputadu António de Sá Benevides, apresia no louva ba esforsu tomak VIII Governu Konstitusionál.

“Tanba foti medida nesesáriu no adekuada kombate surtu COVID-19, ha’u fó apresiasaun ba médiku sira-ne’ebé servisu maka’as. Ho nune’e bankada PUDD deklara fó votu favorável ba estensaun ne’e,” nia dehan. 

Jornalista: Evaristo Soares Martins

Editór: Cancio Ximenes  

HAKEREK NO HATÁN

Please enter your comment!
Please enter your name here