Sekretáriu Estadu Ambiente, Deométrio de Amaral do Carvalho, bainhira fó formasaun ba brigada ambientál sira, kinta (22/10), iha salaun Infordepe Ministériu Edukasaun. Imajen Tatoli/Egas Cristovão

DILI, 22 outubru 2020 (TATOLI)–Sekretaria Estadu Ambiente (SEA) estabelese brigada ambientál no fó formasaun dahuluk hodi envolve iha serbisu voluntáriu joven, nune’e bainhira mosu problema ambientál ruma iha komunidade, ekipa ne’e bele tun direta halo intervensaun.

Atividade ne’e sei realiza durante loron-rua, hahú 22 to’o 23 outubru no sei kontinua lansamentu brigada ambientál iha loron 26 outubru.

“Ohin estabelese brigada ambientál no fó formasaun ba sira. Bainhira formasaun ramata,  parte SEA sei koordena ho minitériu sira hodi kontinua fó formasaun ba futuru hodi ajuda institusaun Estadu sira atende problema emerjénsia ne’ebé mosu iha komunidade nia le’et,” Sekretáriu Estadu Ambiente, Deométrio do Amaral de Carvalho, relata iha salaun Infordepe Ministériu Edukasaun, Balide, kinta ne’e.

Brigada ba defesa ambientál sei kontrola ambiente hanesan sunu rai, soe lixu arbiru, no atividade seluk seluk tan ne’ebé bele estraga ambiente.

Formasaun ne’e organiza rasik hosi SEA no brigadista ne’ebé tuir formasaun hamutuk 300 hosi estudante universitáriu, organizasaun, movimentu no liña ministeriál seluk.

Ekipa formadór hosi Sekretáriu Estadu Deométrio, Diretór Ezekutivu Permatil, Ego Lemos, Diretór Jerál Floresta, no reprezentante hosi Protesaun Sivíl.

SEA sei halo ligasaun ho ministériu sira iha servisu ambiente hanesan Ministériu Agrikultura no Peska (MAP), ne’ebé tau matan ba floresta, ambiente tasi, no sei serbisu ho bombeiru atu fó formasaun ba joventude hodi bele partisipa di’ak liu iha dezastre naturál ruma hanesan rai nakdoko, tsunami, inséndiu boot, atu voluntáriu sira bele halo intervensaun ruma.  

“Dadaun ne’e, bainhira dezatre mosu hanesan estrada kotu, iha ema balun ba haree no lakohi ajuda maibé ba foto fali. Ida-ne’e sosiadade ne’ebé maka nia karatér ladún di’ak, tanba ne’e ita hakarak joven iha responsablidade partisipa, halo kooperasaun, no solidaridade tenke metin,” nia fó hanoin.

Governante ne’e nota katak durante ne’e ema kria organizasaun no movimentu barak, maibé to’o ikus laiha atividade to’o lakon.

“Tanba ne’e maka liuhosi estabelesimentu brigade ambientál ne’e, ita bele hamutuk ho institusaun bombeiru no florestál hodi fó intervensaun kuda ai no hodi reziliénsia ba kontra inséndiu sira,” nia akresenta.

Brigada sira-nia serbisu la ba troka pesoál institusaun sira ninia knaar, maibé ho serbisu voluntáriu ajuda halo intervensaun ba problema ambientál.

“Ita haree Estadu sira hanesan Japaun no nasaun Europa sira, iha ekipa brigada voluntáriu sira ne’ebé iha kapasidade bele kontribui ba dezastre sira ho mentalidade ne’ebé forti, entaun hanesan Japaun molok estruturadu sira halo intervensaun ba dezastre, voluntáriu tenke iha uluk kampu,” Sekretáriu Estadu ne’e esplika.

Iha fatin hanesan, Diretór Jerál SEA, João Carlos Soares, hateten insiativa ne’e atu hafanu fali joven iha organizasaun no movimentu sira atu iha espíritu voluntazmu hodi volutáriamente iha neon no hakarak salva, proteje no konserva ambiente.

“Sira la’ós mai atu troka knaar ofisiál maibé atu ho voluntriamente envolve hodi kontribui  iha área floresta, agrikultura, peska, no protesaun sivíl karik institusaun iha programa,” nia dehan.

Ekipa ne’ebé estabelese ho intensaun atu kore depéndensia ne’ebé haree ba buat hotu tenke iha osan, maibé ho voluntáriu bele partisipa hodi kontribui iha atividade ruma ne’ebé SEA no liña ministeriál halo.

Brigadista no estudante Universidade da Paz, Deviano Martins, apresia inisiativa SEA ne’ebé bele konsensializa estudante, organizasaun no ema hotu bele iha espíritu voluntarizmu hadi’a no dezenvolve nasaun di’ak liután.

“Hanesan estatudante ha’u kontente ho inisiativa Governu tanba ita-nia nasaun presiza ita hotu nia tulun hodi la’o ba oin,” nia dehan.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here