Ministru Turizmu, Komérsiu no Indústria, José Lucas do Carmo Silva. Imajen Tatoli/Egas Cristovão

DILI, 14 outubru 2020 (TATOLI)—Iha implementasaun programa Governu ba rekuperasaun ekonómika kurtu prazu ba cesta bázika ne’ebé tuir planu sei realiza iha dezembru 2020, Ministériu Turizmu, Komérsiu no Indústria (MTKI) sei responsabliza fasilita voucher.

Ministru Turizmu, Komérsiu no Indústria, José Lucas do Carmo da Silva, informa programa ne’e lidera hosi Ministériu Koordenadór Asuntu Ekonómika  (MKAE), ho koordenasaun hosi Ministériu Agrikultura no Peska (MAP), MTKI no Sekretaria Estadu Kooperativa (SEKoop).

“Ami-nia papél haree ba área urbana hanesan sidade Dili no sidade munisípiu sira, konsidera mós postu administrativu ne’ebé iha loja no bele halo atendimentu ho voucher iha programa cesta bázika,” dehan Ministru Jose Lucas , iha Palásiu Governu, kuarta ne’e.

Notísia Relevante: Governu estabelese medida apoiu ba família liuhosi atribuisaun cesta bázika

Daudaun parte MTKI halo ona koordenasaun ho parte hotu maibé presiza halo diskusaun kle’an liután antes ba implementasaun.

“Ami iha prepasaun di’ak ne’ebé lidera hosi Vise-Ministru Turizmu, Komérsiu no Indústria no superviziona hosi Ministru Turizmu Komérsiu no Indústria rasik. Prosesu atu besik konklui ona maibé sei falta tan asuntu balun ne’ebé presiza deskute kle’an,” nia akresenta.

Iha programa ne’e, MAP no SEKoop sei responsabliza fahe produtu cesta bázika ba populasaun.

“Ida-ne’e serbisu liña miniteriál no agora halo preparasaun hela ho ekipa tékniku ida-idak ninian,” nia hatutan.

Cesta bázika ba família ho totál kustu millaun $71,5 (valór bele iha mudansa), ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Apoiu ne’e sei entrega ho forma voucher, ho kompozisaun ai-han ijiene no moos ho baze per kapita dimensaun família ho preferénsia produtu nasionál iha merkadu lokál.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here