Embaixadór kuba iha Timor-Leste , Omar L. Marrero Benctacour. Imajen Tatoli/Egas Cristovão

DILI, 26 outubru 2020 (TATOLI)—Embaixadór Extrordinária Plenipotensiáriu Repúblika Kuba ba Timor-Leste, Omar Lauro Marerro Betancourt, hateten empreza Kuba iha interese hakarak investe iha Timor-Leste iha área produsaun medikamentu farmásia.

Nia hato’o asuntu ne’e bainhira halo sorumutu ida ho Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins, iha Armazén SAMES Kampung-Alor Dili, tersa (26/10).

Notísia Relevante:TL Sei Husu Kuba Apoiu Ai-moruk Prevensaun ba COVID-19

“Iha diskusaun ne’e ita deside hamutuk katak sei halo kontaktu direita hosi SAMES ninian ho empreza sira ne’ebé maka iha interese atu bele halo investimentu  iha Timor-Leste liliu iha área saúde ninian ba produsuan medikamentu farmásia  nomós ba produtu alimentu ne’ebé maka ho nutrisaun ba labarik sira,” dehan nia iha SAMES.

Nia observa katak durante ne’e, TL sei dependensia maka’as ba importasaun medikamentu husi rai-liur, tanba ne’e, Kuba hakarak tulun Governu atu sai husi situasaun dependensia hodi prodúz rasik ai-moruk iha rai-laran.

“Tanba ita haree situasaun agora TL ninian, ita depedensia 100% produtu importasaun hosi liur tanba ne’e maka ho diskusaun ne’ebé maka ita halo ne’e hakarak TL iha nia kapasidade prodúz  rasik ninia produsaun farmásia nian liu-liu ai-moruk báziku sira, tanba ne’e saida maka ita bele halo maka transferénsia teknolojia hosi nasaun Kuba mai Timor-Leste, apoiu tékniku sira mai,” nia dehan.

Nia fiar katak ho diskusaun ne’e sai referénsia ba SAMES atu hanoin ona hodi kooperasaun ho empreza farmásia sira husi Kuba mai investe iha Timor-Leste.

Iha fatin hanesan Diretór SAMES, Santana Martins, informa SAMES trasa ona planu ne’e hahú kedas iha tinan 2018, maibé la konsege implementa to’o ohin loron.

“Entaun ami analiza diskute liu-liu iha proposta ne’ebé maka mai ne’e kompañia sira interesante tebes hakarak mai investe liliu kona-ba produsaun Dekretu Lei 18/2015, 24 juñu, no atividade farmásia 12/2004, ne’ebé ko’alia kona-ba atividade farmásia nian, entaun agora daudaun ne’e SAMES maka iha kompeténsia bele halo produsaun, entaun ita análiza rekursu umanu iha Timor-Leste buat hotu sei falta, entaun ita presiza haree katak SAMES bele halo esforsu, iha futuru ita bele  entaun ita mós investe iha rekursu umanu,” Ezekutivu ne’e hateten.

Notísia Relevante:Médiku espesialista Kubanu 116 mak servisu iha TL

Jornalista: Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here