Ekipa Médiku ezersísiu “Cobra20-2” Komandu F-FDTL no Ministériu Saúde hala’o tratamentu saúde gratuita ba populasaun Munisipiu Baucau. Imajen/F-FDTL

DILI, 26 outubru 2020 (TATOLI)- Ekipa Médiku ezersísiu “Cobra20-2” Komandu FALINTIL -Forsa Defeza Timor-Leste (F-FDTL) servisu hamutuk Ekipa Médiku Ministériu Saúde hala’o atividade tratamentu saúde gratuita ba komunidade Postu Administrativu tolu hanesan, Laga, Baguia no Quelecai, Munisípiu Baucau.

Notísia Relevante : Ezersísiu “Cobra20-2” orienta forsa haklaken dame

Populasaun postu Laga ne’ebé hetan asisténsia hosi ekipa saúde mak komunidade suku Nunira, Saelari no Sagadati. Iha postu Administrativu Quelicai iha suku Afasa no Postu Administrativu Baguia iha suku Lavateri.

Ezersísiu “Cobra20-2” ne’e Komandu F-FDTL hala’o ho objetivu anima povu sira hadook-an hosi konflitu no violénsia sira hodi kria dame ba malu.

Ekipa Médiku ezersísiu “Cobra20-2” Komandu F-FDTL no Ministériu Saúde hala’o tratamentu saúde gratuita ba populasaun Munisipiu Baucau. Imajen/F-FDTL

Reprezentante médiku Cobra20-2 Komandu F-FDTL, Doutór Anacleto Soares, dehan ekipa Cobra20-2 durante  sábadu (24/10) to’o segunda (26/10), kontinua realiza ona eventu kompetisaun desportu futeból envolve feto-mane inklui atividade diálogu ba dame no animasaun múzika no fó asisténsia saúde ba povu.

Programa fó tratamentu gratuita ne’e hodi ajuda povu sira bele halo konsulta ba moras ne’ebé sira iha.

“Ami husi Departamentu Saúde militár servisu hamutuk ho Ministériu Saúde ami lori programa tolu mak importante hanesan prevensaun ba surtu COVID-19, relativa ho nutrisaun no oferese tratamentu saúde gratuita ba komunidade sira,” doutór Anacleto hateten liuhosi komunikadu imprensa ne’ebé Agênsia Tatoli asesu hosi Komandu F-FDTL, ohin.

Doutór Anacleto hatutan, depois halo konsulta, sira sosializa mós regra prevensaun COVID-19 ba populasaun atu kumpre nafatin regra Estadu Emerjénsia.

Tuir nia, moras COVID-19 hanesan preokupasaun globál iha mundu hamate ona ema rihun no to’o agora seidauk  iha ai-moruk ruma atu kura.

Iha fatin hanesan reprezentante médiku Postu Saúde Atelari, Clara Domingos de Carvalho,  dehan sira kontente tebes bele servisu hamutuk ho Komandu F-FDTL fó asisténsia saúde ba populasaun sira

Moras ne’ebé ekipa médiku sira rejista aas iha maka ispa, isin katar no isin manas no moras seluk tan.

Nia hatutan, iha Sentru Saúde Atelari kada fulan fó asisténsia saúde ba povu ne’ebé ba halo konsulta bele to’o 60 ba leten.

Iha fatin hanesan, Xefe Suku Atelari, Moizés do Rosário, konsidera programa ezersísiu ne’e fó benefísiu ba povu hodi moris hakmatek no povu kontente bele hetan tratamentu saúde gratuita.

Nia dehan, misaun servisu ne’ebé Komandu F-FDTL halo importante tebes ajuda povu, liu-liu grupu juventude sira atu kria dame hodi hakotu violénsia no krime labele akontese beibeik durante ne’e.

Jornalista   : Eugénio Pereira

Editór        : Francisco Simões

1 KOMENTÁRIU

  1. Agradece tbs ba forca defeza sra nbe mk halao ona masal saude komunitaria ba suco 10 inclui Suco Namanei nbe hetan tratamentu saude husi ekipa força military sra, e hau nundar comunidade husi suco namanei oan hakarak hatoo dt suguestaun katak sebele krk programa ne bele colabora ho programa Saude Nehan tamba iha Area rural menus coinesementu husi populasaun kona ba saude Nehan nee menus tebes, mak ne dt suguestaun hau hatoo obrigado wain

HAKEREK NO HATÁN

Please enter your comment!
Please enter your name here