Sekretáriu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Egas Cristovão

DILI, 28 setembru 2020 (TATOLI)-Sekretaria Estadu Komunikasaun Sosiál (SEKOMS) daudaun ne’e halo hela peskiza atu inisia lejizlasaun kombate hoax.

Sekretáriu Estadu Komunikasaun Sosiál, Merício Juvinal dos Reis ‘Akara’ konsidera presiza lejizlasaun ruma atubele regula hoax ka lia falsu.

“Liga ba hoax, ha’u orienta ona ekipa jurídiku SEKOMS atu hahú rekolla dadus, halo estudu komparativu oituan ho referénsia hosi nasaun seluk hanesan Singapura, Alemaña ka nasaun seluk ne’ebé iha lei espesiál kontra hoax. Entaun ekipa agora dezenvolve hela no ita sei haree planu atu halo ezbosu ida kona-ba kombate hoax,” dehan  Sekretáriu Estadu Akara ba Agência Tatoli iha ninia knaar fatin, Palásiu Governu, segunda ne’e.

Notísia Relevante: SEKOMS lansa kampaña nasionál kontra hoax no promove internet saudável

Governante ne’e otimista ninia ekipa bele dezeña lei espesífiku ida sein hamenus ema-nia direitu espresaun.

“Iha tempu badak sira sei halo relatóriu ida ba ha’u, hafoin ha’u haree kuandu sufisiente ona maka sei transmite ba Ministru Asuntu Parlamentár no Komunikasaun Sosiál (MAPKOMS) atubele diskute, hafoin lori ba Konsellu Ministru hodi apresia,” nia informa.

Aleinde ne’e, SEKOMS daudaun halo ona esbosu Lei Radiodifuzaun ne’ebé maka inisia ona desde tinan kotuk.

“Esbosu ne’e pasa ona ba Señor Ministru, ne’ebé gabinete MAPKOMS maka haree atubele lori ba Konsellu Ministru,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here