CAC hala'o sensiblizasaun lei MPCC ba kargu xefia sira iha Parlamentu Nasionál. Imajen TATOLI/Evaristo Soares Martins.

DILI, 23 outubru 2020 (TATOLI)—Comissão Antí Corrupção (CAC) hala’o sensibilizasaun lei Medida Prevensaun no Kombate Korrupsaun (MPCC-sigla portugés) ba dirijente sekretariadu nian no funsionáriu sira iha Parlamentu Nasionál (PN).

Notisia Relevante: PN planeia sensibiliza lei MPCC ba komunidade

Sensbilizasaun kona-ba ba lei Medida Prevensaun no Kombate Korrupsaun hala’o iha loron sesta, 23 outubru 2020, iha sala konferénsia Parlamentu Nasionál.

Sekretária Jerál Parlamentu Nasionál, Cedelizia Faria dos Santos, hateten lei refere parlamentu mak aprova entaun dirijente sira iha parlamentu mós tenke komprende didi’ak lei ne’e.

“Ami konvida CAC mai hodi sensibiliza ba ami kona-ba lei MPCC, liuliu iha parte prevensaun nian hodi nune’e kargu xefia sira bele hatene loloos lei ne’e inklui ami hakarak hatene oinsá deklara riku-soin tanba ita-nia lei foun ne’e mós haruka kargu xefia tenke deklara rikusoin,” Cedelizia Faria dos Santos informa ba jornalista sira, iha Parlamentu Nasionál, sesta ne’e.

Nia hatutan, sensibilizasaun ne’e parte ida atu kargu xefia iha Parlamentu Nasionál hadook-aan hosi aktu korrupsaun.

Entretantu, Diretór Jerál Comissão Antí Corrupção (CAC), Rosário Salsinha de Araújo, esplika sensibilizasaun ne’e hanesan fahe esperiénsia liuliu kona-ba lei MPCC ne’e.

Diretór Jerál CAC, Rosário Salsinha de Araújo. Imajen TATOLI/Evaristo Soares Martins.

“Sira hakarak hatene CAC nia mekanizmu sira kona-ba deklarasaun rendimentu ne’ebé liga kedas ba kargu xefia sira tanba aban bainrua sira hola responsabilidade oinsá deklara sira-nia riku-soin tenke ho justu, transparente. Kargu xefia sira tenke hasees tiha konflitu interese ne’e. Nune’e mós ami fahe esperiénsia liga ba asuntu kriminál sira iha Kódiu Penál, liuliu asuntu korrupsaun nian,” Diretór Jerál CAC ne’e hateten.

Diretór Jerál CAC ne’e informa ba kargu xefia sira katak bainhira kompleta ona loron 180 (fulan-neen) entaun lei refere sei implementa iha marsu 2021.

“Vigora ne’e ba fulan neen entaun fulan-marsu 2021 hahú implementa ona lei MPCC ne’e. Ohin, ami sensibiliza lei ne’e nune’e kuandu tama iha implementasaun ema barak bele komprende ona,” nia dehan.

Iha sensibilizasaun ne’e, Diretór Jerál CAC ne’e esplika liu kona-ba medida prevensaun hahú hosi kapítulu dahuluk prevensaun jerál no kapítulu daruak rendimentu nian.

“Kargu xefia sira tenke komprende didi’ak kona-ba deklarasaun rendimentu ne’e no sira-nia obrigasaun oinsá deklara rikusoin ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here