Saudozu Kapitaun Fragata João Francisco de Fatima “Buka Tuir”. Imajen/Dok.F-FDTL

DILI, 22 outubru 2020 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál, Lere Anan Timur, deklara, Komandu F-FDTL liuliu Komponente Forsa Navál “lutu” no triste boot tanba lakon kuadru importante ida iha Komponente Forsa Navál Lijeira (CFNL), Kapitaun Fragata João Francisco de Fatima “Buka Tuir” ne’ebé hakotu iis iha Ospitál Nasionál Guido Valadares (HNGV), ohin.

Notísia Relevante : Kapitaun Fragata ‘Buka Tuir’ hakotu iis iha HNGV

Lere dehan, João “Buka Tuir” nu’udar veteranu rezisténsia ida ne’ebé dedika  nia aan tomak durante luta no kontinua hala’o nafatin knaar iha Komandu Komponente Navál to’o nia peregrinasaun ikus.

Majór Jenerál Lere Anan Timur. Imajen/António Gonçalves

“Triste tebes, ami lakon tan ofisiál superior ida ne’ebé nia moras kleur ona, uluk nia ba halo tiha tratamentu saúde iha ospitál Singapura mai rekupera depois komesa ativu iha servisu hala’o reuniaun ho ha’u nia sei fó nia pontudevista ba ha’u. Ohin dadeer sira informa dehan nia sei halo ezersísiu mak mate Lere Anan Timur haktuir ba jornalista iha Komandu Jenerál F-FDTL, Fatuhada, Dili.

Lere dehan, mate nu’udar peregrinasaun ikus hosi ema hotu ne’ebé moris iha mundu, tanba Nai Maromak deside on idak-idak nia vida.

“Ita lakon komandante no alin di’ak ida   ne’ebé sempre partisipa iha funu,” Jenerál hateten.

Lere dehan, durante ne’e Komandu F-FDTL koopera ho governu hodi tau matan ba saúde veteranu tomak, maibé importante liu maka governu presiza tau matan ba família matebian ho faluk oan kiak sira.

Matebian hakotu is iha HNGV iha tuku 05:00 madrugada, tanba moras komplikadu. Saudozu mate husik hela fen kaben ho oan  na’in  haat; mane na’in rua no feto na’in rua.

Saudozu Kapitaun Fragata João Francisco de Fatima “Buka Tuir” moris iha Loi-Huno,  iha loron 10 outubru  1969 , oan hosi António  da Costa Guterres Fatima ho Clementina da Costa.

Saudozu hahú inkorpora mai iha Instituisaun F-FDTL  iha loron 02 fevereiru 2001 iha 1˚ Batalão.  Iha loron 21 juñu 200, saudozu  promove ba Tenente.  Iha tinan 2002 saudozu koloka iha CICNL nu’udar Instrutór. Iha loron 16 dezembru 2005  promove saudozu ba Primeiru Tenente.

Iha loron 25 juñu 2007, saudozu koloka iha komponente Naval nu’udar segundu Komandante Navál. Iha fali loron 07 abríl 2012, promove saudozu ba kapitaun Tenente no  iha loron 19 novembru 2018, saudozu koloka nafatin iha komponente Navál nu’udar  mós segundu Komandante Navál.

Iha loron 13 abríl 2015, saudozu koloka fali iha Kuartél Jenerál sai hanesan Xefe Divizaun CENOP. Iha loron 02 fevereiru 2020  promove ba Kapitaun de Fragata.

Saudozu koloka nafatin iha  Kuartél Jenerál nu’udar  Xefe Divizaun J6. Durante nia servisu, saudozu komesa hetan moras ne’ebé ke afeta ba nia saúde.  Ne’e duni halo nia  fraku no konsege ba halo tratamentu iha Ospitál Singapura, maibé esforsu hirak ne’e la konsege atu hanaruk saudozu nia vida.

Durante tinan 19 ho balun nia laran ne’e, saudozu hala’o buat barak hanesan servisu militár ninian no partisipa iha treinamentu no kursu sira  ne’ebé instituisaun haruka kursu hirak ne’e mak hanesan tuir mai ne’e;

  1. Iha loron 02 fevereiru de 2001 tuir kursu de Formação Oficiais e Sargentos   (CFO e CFS).
  2. Iha loron 11 fevereiru 2001 tuir kursu Lingua Portuguesa.
  3. Iha loron 16 marsu 2004 Basic & Advanced Supply Course.
  4. Iha loron 17 dezembru 2010 tuir kursu Formasaun Ofisiál Superiór.

5 . Iha loron 30 janeiru 2014 tuir kursu Elementár Estadu Maiór

Saudozu mós hala’o kna’ar ne’ebé Instituisaun fó fiar ba nia durante ne’e. Buat barak mak nia konsege hala’o ona no balun nia sei hala’o hela ho esperansa iha 2020 ne’e nia bele finaliza servisu sira ne’e, infelizmente esperansa sira ne’e la sai ba realidade tanba Nai Maromak bolu ona nia.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here