Kapitaun Fragata hosi komponente navál FALINTIL-Forsa Defeza Timor Leste (F-FDTL), João Francisco Fatima alias ‘Buka Tuir’. Imajen/Julião Fernandes Guterres.

DILI, 22 outubru (TATOLI)—Kapitaun Fragata hosi komponente navál FALINTIL Forsa Defeza Timor Leste (F-FDTL), João Francisco Fatima alias ‘Buka Tuir’ hakotu iis iha Hospitál Nacionál Guido Valadares (HNGV) tanba moras komplikasaun.

”Ohin dadaer tuku 05:00 matebian ba hala’o ezersísiu iha Tasi-Tolu mak hetan atakasaun. Matebian nia kolega evakua kedan ba sentru saúde Comoro maibé la konsege salva no transfere mai iha Hospitál Nacionál Guido Valdares, to’o iha emerjénsia doutór sira koko iis laiha ona,”  matebian nia inan hakiak, Emília Francisca, haktuir ba jornalista sira iha mortuáriu HNGV, Bidau, Dili, kinta ne’e.

Emília hateten, tuir buat ne’ebé doutór sira hateten katak matebian sofre moras komplikasaun.

“Los duni, matebian moras atakasaun ne’e dezde fulan jullu tinan 2019, família sira lori mai duni Hospitál Nacionál Guido Valadares, depois doutór sira konsulta katak matebian stroke no isin parte sorin mate hotu. Depois baixa kuaze fulan ida-resin evakua ba Singapura hodi halo tratamentu to’o fulan tolu, depois fila-fali mai Timor no kontinua halo terapi,” inan hakiak ne’e esplika.

Emília mós triste no sente lakon tanba matebian tuir loloos hakaas aan hela hodi halo ezersísiu iha dadeer no lororaik, esforsu-aan atu di’ak maibé ohin madrugada atakasaun no evakua maibé la konsege salva nia vida.

Tuir planu, ohin, família lori sai mate-isin hosi mortuáriu HNGV ba rezidénsia Colmera, no sei transporta ba matebian nia moris fatin iha Muníspiu Viqueque atu hala’o despedida ikus ho família no sei lori mai haloot iha Jardím dos Herois Metinaro, Dili.

Kapitaun Fragata João Francisco Fatima ‘Buka Tuir’ husik hela nia kaben ho oan na’in haat, feto na’in-rua (2) no mane na’in-rua (2) ho família.

Jornnalista: Felicidde Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here