Prosesu aprendizajen iha Eskola 4 Setembru UNAMET Balide, Dili. Imajen/Dok. Espesiál

DILI, 22 outubru 2020 (TATOLI) –Eis diretór Eskola 4 Setembru UNAMET, Balide, Dili ho inisiál ACB,  ohin, obrigadu simu títulu hanesan arguidu perante justisa iha Tribunal Distritál Dili (TDD) tanba deskonfia komete krime pekulatu hodi fó prejuizu ba Estadu ho valór osan $19,102,00.

Notísia Relevante : Deskonfia, funsionáriu ME ida utiliza foos merenda eskolár ba interese privadu

Arguidu ACB nu’udar funsionáriu públiku ne’ebé hahú hosi 2012 to’o janeiru 2019, asume kargu hanesan diretór Eskola Sekundáriu Jerál 4 de Setembru UNAMET, Balide, Dili.

Faktu ne’ebé aprezenta hosi Ministériu Públiku ba TDD katak, iha loron 4 setembru 2016, arguidu hato’o karta koñesimentu ida ba membru Governu  tutela Ministériu Edukasaun kona-ba inisiativa eskola husu kontribuisaun ba inan ho aman hosi estudante sira-nian ho montante kada fulan $1,00 ho objetivu mak hanesan; fó insentivu ba profesór voluntáriu no reklamante hodibele orienta matéria hanesan teknolojia multimedia, jeolojia, desportu, temas literatura no kultura, fó insentivu ba seguransa eskola ida, eskola bele halo reparasaun ki’ik  hanesan tula rai-henek no simentu inklui mós selu badaen sira hadi’a moru eskola nian ne’ebé mak aat.

Iha loron 5 abríl 2016, Ministériu Edukasaun liuhosi Diresaun Edukasaun Munisípiu Dili, fó resposta ba karta arguidu nian hodi la autoriza arguidu husu kontribuisaun ba inan ho aman estudante sira-nian, tanba seidauk iha diploma ministeriál ida hosi Ministru Edukasaun kona-ba asuntu ida-ne’e.

Hetán ona resposta negativu, maibé arguidu ho inisiativa rasik kria no estabelese ekipa ida, hodi sai hanesan komisaun organizadora hodi halo kobransa ka kolleta osan hosi estudante sira kada fulan $1,00.

Rezultadu auditória husi Gabinete Inspesaun Jerál Ministériu Edukasaun nia hatudu katak osan ho kuantia $1,00 ne’ebé mak estudante sira selu kada fulan ne’e, hahú aplika hosi 2016 to’o 2018 ho montante $134, 095.50.

Iha implementasaun hosi total orsamentu  ne’e deteta katak, arguidu autoriza hodi empresta osan ho total $2. 378.00 ba nia kolega profesór.

Arguidu mós deside hodi fó insentivu ba manorin sira hanesan transporte ho insentivu ba vijilante sira durante ezame nasionál iha tinan 2017 ho totál  $16. 724.00.

Arguidu deside hodi fó  insentivu ho kuantia $16. 724.00 ba manorin sira durante ezame nasional ne’e la ho baze legál ka sein fó koñesimentu ba Ministru Edukasaun nu’udar nia superiór.

Konsekuénsia direta no nesesáriu hosi hahalok arguidu nian ne’e Estadu Timor-Leste (Eskola Sekundáriu Públiku 4 de Setembru UNAMET), hetan prejuizu hamutuk  $19,102,00.

Arguidu rasik hatene ona katak hanesan funsionáriu públiku insentivu sira hanesan ne’e tenke prevee iha orsamentu Ministériu Edukasaun nian no labele halo kobransa ba estudante sira hodi fasilita atividade sira hanesan ne’e tanba ne’e kompeténsia Governu nian nomeadamente tutela Ministériu Edukasaun.

Arguidu aproveita ninia pozisaun nu’udar diretór eskola hodi hola desizaun ne’ebé fó benefísiu ba arguidu ho nia kolega manorin sira no ilejitimamente sira apropriadu tiha, ba benefísiu própriu, osan hirak-ne’e, arguidu hatene hela katak la’ós ninian no nia viola daudaun ninia devér étiku profesionál sira.

Arguidu hatene hela katak ninia konduta  ne’e nia halo daudaun hela krime ida kona ba ezersísiu hosi nia funsaun sira hanesan funsionáriu públiku. Mezmu nune’e arguidu hakarak duni, deliberadamente, prejudika normál funsionamentu serbisu nian no estraga ninia imajen iha komunidade nia let.

Arguidu hatene hela katak ho nia komportamentu ne’e, hatudu katak nia la hatene nórma ka prosedimentu legál sira kona-ba prestasaun servisu públiku, devér jerál sira lealdade, obediénsia, selu no izensaun nian.

Ba kazu ne’e, MP konstitui arguidu ACB nu’udar autór materiál ho forma konsumada ba krime pekulatu ne’ebé previstu no punidu iha artigu  295 númeru 3 hosi Kódigu Penál Timor-Leste.

Hatán ba akuzasaun hirak-ne’e, arguidu ACB konfesa integralmente  ba Tribunál katak faktu sira  ne’e loos no balun la loos. Nia konfirma kona-ba valór osan hosi tinan 2016-2018  kuaze iha  rihun  $88-resin.

Nia esplika, la’ós kobransa maibé  kontribuisaun voluntária ne’ebé  bazeia ba enkontru entre inan-aman hosi estudante sira ho sira nia parte tanba haree ba nesesidade ne’ebé iha atu responde liuliu fó insentivu ba manorin voluntáriu, insentivu ba manorin sira iha  ámbitu ezame nasionál, hadi’a moru eskola nian ne’ebé mak aat no seluk tan, tanba orsamentu ne’ebé Governu kada trimestrál aloka ba eskola refere labele korresponde hotu.

Nia dehan, karta ne’ebé dirije ba iha superiór ME iha resposta duni katak laiha lei  atu eskola públika halo kobransa ba estudante sira, maibé  iha karta ne’e mós deskreve katak eskola bele halo programa espesífiku kona-ba kontribuisaun ne’e.

Tanba ne’e, tuir  nia entendimentu, deside   halo kontribuisaun ba estudante sira  iha eskola 4 Setembru UNAMET  ho  alunu hamutuk 3.000-resin, maibé ho temporáriu  ne’ebé la’o transparénsia no  parte hotu envolve hanesan iha  komisaun ne’ebé estabelese iha eskola.

Kona-ba osan ne’ebé hosi kontribuisaun estudante sira nian  hodi fó empresta tutan ba profesór sira, arguidu ACB  dehan, loos duni tanba iha nesesidade família urjente nune’e autoriza hodi  fó empresta, maibé to’o agora hosi montante osan ne’ebé iha daudaun ne’e manorin sira selu fali ona no hela balun mak seidauk, maibé sira sei selu fali hotu.

Audiénsia julgamentu ne’e prezide hosi juis koletivu Ivan Suritai, Maria Solana, Ana Paula Fonseca no Ministériu Públiku reprezenta hosi prokuradór na’in ida no arguidu hetan asisténsia legál hosi Defensór Públiku Manuel Exposto.

Jornalista: Nelson de Sousa

Editór: Francisco Simões

HAKEREK NO HATÁN

Please enter your comment!
Please enter your name here