DILI, 21 outubru 2020 (TATOLI)- Arguidu ho inisiál ZMM nu’udar funsionáriu públiku iha Ministériu Edukasaun (ME) iha Munisípiu Ermera, utiliza foos merenda eskolár no orsamentu ba alugér karreta nian ba interese privadu.
Kazu ne’e tuir loloos, ohin, iha audiénsia julgamentu iha Tribunál Distritál Dili (TDD) rona sasin na’in-neen (6) ne’ebé marka prezensa ona, maibé arguidu edital la marka prezensa.
“Antes ne’e parte ofisial sira la notifika arguidu, nune’e to’o agora seidauk hatene paradeiru arguidu nian, nune’e ha’u adia fila-fali julgamentu ne’e ba loron seluk,” Juiza prosesu Ercilia da Costa, hateten iha sala audiénsia.
Parte Ministériu Públiku no defeza husu ba Tribunál atu kontinua buka paradeiru arguidu nian hodi notifika atu bele tuir julgamentu iha tempu tuir mai no tuir informasaun antes ne’e arguidu enfrenta prosesu kazu ne’e parte superior demite ona arguidu.
Tuir lei, kuandu arguidu kontinua la hetan nia paradeiru mak sei tau hanesan edital no julgamentu kontinua la’o hodi bele rona sasin sira. Ho nune’e, Tribunál deside adia fila-fali julgamentu ba iha loron 23 juñu 2021, tuku 14:00 Otl.
Tuir faktu akuzasaun hosi Ministériu Públiku (MP) katak, iha tinan 2010-2011 arguidu hanesan koordenadór ba programa merenda eskolár iha Munisipiu Ermera.
Iha 2010 Ministériu Edukasaun (ME) haruka foos hamutuk saku 10.606 (kada saku 25 kg) no orsamentu $5,500.00 destina hodi halo alugér karreta hodi transporta foos ba eskola sira iha Ermera.
Iha 2011, ME haruka foos hamutuk saka 13.223 no osan montante $10,889.80 destina hodi halo alugér karreta hodi transporta foos transfere ba eskola sira iha Ermera.
Arguidu mak simu direita foos iha sede Ermera hafoin transporta foos sira ne’e ba eskola no selu transporte.
Akontese iha relasaun 2010 arguidu apena atribui de’it foos saka 7.798, iha ne’ebé distribui ba eskola Atsabe saku 1073, eskola Railaco saku 758, eskola Hatolia saku 2199, eskola Lete-Foho saku 1669 no Ermera saku 2099.
Akontese mós 2011 , arguidu atribui de’it foos ba eskola sira hamutuk saku 9.169, iha ne’ebé distribui ba eskola Atsabe saku 1636, eskola Railaco saku 1372, eskola Hatulia saku 325, eskola Lete-Foho saku 2451 no Ermera saku 3385.
Ho nune’e, iha tinan 2010 arguidu aprópria tiha ka utiliza tiha foos hamutuk saku 2.808 no tinan 2011 ho saku 4.054 ba interese privadu ne’ebé parte ME aloka ba Munisípiu Ermera.
Faktu akuzasaun mós hatudu katak iha tinan 2010 arguidu selu transporte hodi transporta foos ba eskola sira ho kuantia osan $400,00 no antes ne’e parte ministériu aloka ho montante $5.500,00.
Ba 2011 arguidu selu transporte hodi transporta foos ba eskola sira ho kuantia osan $3,435,00 no mezmu parte ministériu aloka ho montante $10,889,00.
Arguidu iha relasaun ho orsamentu ne’ebé simu hodi transporta foos durante iha tinan 2010 no 2011, apropria tiha ho valor $12.554,00.
Faktu akuzasaun haktuir iha 2010 no 2011, arguidu mós halo pagamentu ba transporte ne’ebé transporta foos ba eskola sira hanesan Leim S. Balo, Asul Lação, Matata, arguidu fó de’it foos ba motorista kamioneta hamutuk saku 27.
Arguidu aproria foos ne’ebé destina ba programa merenda eskolár, hatene katak propriedade Estadu nian, maibé arguidu aproveita utiliza própriu.
Iha foos balun arguidu apropria hodi fa’an fila-fali ba kioske kada saku ho folin $12.00 iha Ermera.
Arguidu serve nia funsaun atribuisaun hanesan koordenadór programa merenda eskolár iha Munisípiu Ermera aproveita hodi apropria tiha foos no orsamentu pagamentu transporte.
Arguidu halo hahalok ne’e livre deliberadu ho konsientemente ho propózitu utiliza patrimóniu Estadu ba interese privadu hodi bele hetan vantajen ilejítimu.
Arguidu hatene katak hahalok ne’e proibe tuir lei penal maibé kontinua pratika aktu refere. Ho nune’e, MP promove arguidu ZMM ho krime pekulatu iha artigu 295 iha kódigu penal Timor-Leste.
Jornalista: Nelson de Sousa
Editór: Francisco Simões
