Komandante PNTL Munisípiu Dili, Superintendente Xefe Henrique da Costa. Imajen Tatoli/Eugénio Pereira

DILI, 21 outubru 2020 (TATOLI)- Durante trimestre daruak, jullu-setembru, tinan ne’e, Polísia Munisípiu Dili rejista kazu krime hamutuk 445 ne’ebé komete hosi Timoroan sira.

Notísia Relevante : PNTL Rejista Kazu Asidente no Insidente Hamutuk 173

Komandante PNTL Munisípiu Dili, Superintendente Xefe Henrique da Costa hateten,  iha fulan tolu (3) nia laran Komandu PNTL Munisípiu Dili rejista kazu krime hamutuk 445.

Kazu hirak ne’ebé domina maioria ofensa integridade fízika hamutuk 155, violénsia doméstika 47 no kazu seluk tan.

Komandu PNTL Munisípiu Dili mós rejista kazu infrasaun hamutuk 1.587 maioria motorista sa’e la uza kapasete no seluk tan. Infratór sira selu multa ka koima durante fulan tolu (3) hahú jullu-setembru, hamutuk $54.459.

“Husi kazu krime no infrasaun ne’ebé maka iha loke PNTL Dili nia matan atu buka maneira hodi prevene no kombate,” informa Superintendente Xefe Hanrique da Costa, liuhosi karta komunikadu ne’ebé Agência Tatoli asesu, ohin, hosi Komandu Jerál PNTL.

Nia hateten, komandu PNTL Dili buka maneira oinsá atu bele eduka sosiedade hodi halo prevensaun ba krime liuhosi medida ida maka vizibilidade, envolvimentu no profisionalizmu (VIP).

“Medida vizibilidade maka hanesan agora ita koloka ita nia polísia barak iha estrada, prezensa iha komunidade nia leet liuhosi patrulla no seluk tan,” nia hateten.

Nia dehan, agora daudaun polisia halo servisu maka’as envolve mós  membru Konsellu Polisiamentu Komunitáriu (KPK), lider komunitáriu sira, juventude no parseiru sira hotu atu servisu hamutuk ho polísia.

“Ho envolvimentu ita hotu nian hodi apoiu seguransa sai hanesan pontu pozitivu ida hodi  prevene no kombate krime. Ita mós nafatin eduka ita nia povu liuhosi programa polisia vizita ba kampus, atividade ida ne’e remata iha fulan kotuk ne’ebé identifika universidade hamutuk 11 ne’ebé Departamentu Polísia Komunitária, Investigasaun no Tránzitu sira maka halo sosializasaun kona-ba Servisu Polisiamentu Komunitária, Regra Tránzitu no Prevensaun Krime,” nia hateten.

Programa segundu ne’ebé maka PNTL sei realiza iha novembru, tinan ne’e, maka programa Polísia Vizita ba Eskola hodi halo sensibilizasaun ba estudante sira. 

 Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here