Korpu Dosente Universidade da Paz (UNPAZ) na’in-62 kompleta sira nia kursu pedagojia faze formasaun Eskolár durante semana-rua iha Sentru Formasaun Polísia (CFP). Imajen/PNTL

DILI, 21 outubru 2020 (TATOLI)- Korpu Dosente Universidade da Paz (UNPAZ) na’in-62 kompleta sira nia kursu pedagojia faze formasaun eskolár durante semana rua iha Sentru Formasaun Polísia (CFP-sigla portugés) no sei kontinua pratika durante fulan-tolu (3) iha sira nia universidade.

Notísia Relevante : CFP realiza formasaun pedagojia ba dosente UNPAZ

Komandante  Sentru Formasaun Polísia (CFP), Superintendente Xefe Arquimino Ramos hateten, kursu ne’e realiza bazeia ba rekomendasaun painél internasionál ne’ebé Ajénsia Nasionál ba Avaliasaun no Akreditasaun Akadémika (ANAAA) konvida iha tempu hirak liubá sira halo vizita ba universidade hotu no haree katak Sentru Formasaun Polísia ho padraun nivel internasionál, nune’e professor Hasma rasik rekomenda ba magnétiku retór sira hotu atu halo estudu komparativu iha CFP tanba iha métodu hanorin ho ninia métodu aprendizajen ne’ebé di’ak ona iha Timor-Leste.

Komandante ne’e haktuir tan hafoin formasaun klase durante semana rua sei kontinua pratika durante fulan-tolu (3) no Instrutór sira sei akompaña dosente sira oinsá prepara manuál, planu lisaun, planu sesaun, métodu hanorin no oinsá avalia paper bainhira métodu hirak ne’ebé maka instrutór hanorin sira kompleta no hadi’a di’ak hotu ona sira avalia no halo ezame iha sira nia universidade.

Daudaun ne’e, UNPAZ halo ona kooperasaun ho CFP no sira fó bolsu estudu ba membru PNTL  lisensiadu na’in-rua no mestradu na’in-rua kada tinan.

“Ami sente buat ida kooperasaun ne’e ami simu no ami mós tenke fó buat ne’ebé PNTL bele maka kursu pedagojia ne’ebé dezenvolve kleur ona dezde tinan 2004 to’o agora,” Superintendente Xefe Arquimino Ramos hateten liuhosi karta komunikadu imprensa ne’ebé Agência Tatoli asesu hosi Komandu Jerál PNTL.

Magnífiku Retór UNPAZ, Adolmando Amaral hateten, kursu ne’e ajuda tebes UNPAZ atu dosente sira afirma loloos sira-nia pozisaun hanesan dosente tanba sai dosente ne’e tenke iha vokasaun no matenek.

“Ita iha ona mais badaen no abilidade ne’e presiza aumenta liuhosi formasaun atu nune’e estudante sira bele aproveita ho sistemátiku,” nia hateten.

Adolmando hatutan, antes ne’e sira halo ona estudu ne’ebé formasaun semana-rua iha teoria no fulan-tolu iha pratika ne’e depende ba dosente sira ne’ebé prontu ona ekipa formadór sira, ANAAA no INDIMO sei akompaña pratika iha universidade.

Diretór ANAAA, Edmundo Viegas hateten, inisiativa ida ne’e di’ak tebes hala’o bazeia ba kooperasaun entre instituisaun Ensinu Superior no CFP hosi parte ANAAA apresia presizamente tanba ninia formadu sira ne’e dosente.

Nia hatutan, ANAAA presta atensaun espesiál ida no mós fó apresiasaun ba instituisaun rua ne’e tanba hola inisiativa realiza kursu formasaun pedagojia ba Professor Ensinu Superiór nian para hakbiit sira hodi komplementa sira nia kompeténsia.

Edmundo hatutan, dosente sira barak mak matenek iha sira ida-idak nia área, maibé fatór esensiál ida ne’ebé  sira hotu-hotu hakarak enkoraja ba instituisaun superiór sira katak mestre sira mós tenke iha kapasidade no kbiit atu transfere sira nia matenek ba estudante sira.

“Mensajen ne’ebé ha’u hato’o ba komandante CFP no Magnífiku Reitór UNPAZ karik inisiativa kursu ida ne’e bele atrai mós interese no atensaun hosi instituisaun ensinu superiór sira seluk iha tempu badak,” nia hateten.

Serimónia enserramentu ne’e partisipa hosi Segundu Komandante CFP Superintendente Boavida Ribeiro, Korpu dosente UNPAZ, Instrutór no konvidadu sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here