Segundu Komandante Jeral PNTL Komisariu Mateus Fernandes no Reitór UNPAZ, Adolmando Amaral hasai fotografia hamutuk ho dosente sira ne’ebé tuir formasaun Pedagozia iha Centru Formasan Polisia Comoro Dili. Imajen/PNTL

DILI, 23 setembru 2020 (TATOLI)- Komandu Polísia Nasionál Timor-Leste (PNTL) liuhusi Sentru Formasaun Polísia (CFP) halo formasaun pedagojia ba korpu Dosente Universidade da Paz (UNPAZ) hodi kualifika dosente sira nia abilidade atu hanorin.

Notísia Relevante : Polísia Sei Fó Formasaun Ba Dosente UNPAZ

Komandante CFP, Superintendente Xefe Arquimino Ramos hateten, formasaun pedagojia ne’e dedika liubá korpu dosente sira ne’ebé presiza iha abilidade atu prepara oinsá sira hanorin, prepara manuál, planu lisaun, planu sesaun, no power point tanba dosente ida-idak presiza iha koñesimentu, abilidade no attitude hodi transfere ba estudante sira.

“Ita hatene ita nia kualidade rekursu umanus iha Timor-Leste presiza hadi’a buat balu tanba korpu dosente barak mai ho background oi-oin, balu iha siénsia sosiais, ekonomia no enjeñaria sira iha matenek kona-ba ida ne’e, maibé atu hanorin presiza iha abilidade,” dehan Komandante CFP, Superintendente Xefe Arquimino Ramos liuhusi komunikadu imprensa ne’ebé Agência Tatoli asesu, ohin.

Superintendente Xefe Arquimino dehan, formasaun iha Timor atu fahe matenek ba dosente sira hodi hasa’e sira nia rekursu umanu.

“Ita fó matenek de’it ita la fó formasaun karater entaun ne’e presiza kada kurríkulu no lisaun tenke iha objetivu aprendizajen estudante sira tenke iha koñesimentu, abilidade no atitude ne’e maka impoin iha kurríkulu ne’ebé mestre sira tuir loloos tenke hanorin, tanba ne’e maka liuhusi formasaun ida ne’e korpu dosente sira bele aprende pedagojia oinsá maka bele hanorin di’ak iha aula, komunikasaun, lian oinsá no kontrola klase oinsá para sira iha koñesimentu di’ak atu hanorin,” nia hateten.

Iha fatin hanesan, Reitór UNPAZ, Adolmando Amaral hateten, antes ne’e UNPAZ iha ona nota kooperasaun (MoU) ho CFP iha kooperasaun ne’e sira oferese bolsa estudu ba PNTL no   UNPAZ aproveita saida maka PNTL iha, depois diskusaun naruk CFP bele fó formasaun ba dosente sira.

UNPAZ hili CFP atu fó formasaun hodi sertifika dosente sira tanba úniku instituisaun iha Timor agora daudauk ne’e maka CFP ho INDIMO maka bele sertifika formadór sira.

“Ami nia dosente sira konsidera hanesan formadór tanba ne’e maka ami lori sira mai iha ne’e atu hetan formasaun para depois sertifika sira hodi prepara aan sai formadór ne’ebé di’ak ba estudante sira,” nia hateten.

UNPAZ iha fakuldade neen (6) ho Programa de Estudu 24 ne’ebé sira sei foti reprezentante husi programa estudu hirak ne’e ida-idak mai tuir sira nia área konsentrasaun ho esperansa katak  depois formasaun ida ne’e dosente sira preparadu ona sai formadór ne’ebé di’ak atu hanorin estudante sira hodi garante kualidade rekursu umanus.

Reprezentante Diretór INDIMO Amândio Belo hateten, formasaun  ne’e liga liu ho INDIMO katak formasaun hotu-hotu ho nivel I to’o IV hakarak garante nia kualidade, dokumentu ba formasaun ne’ebé halo bazeia ba nesesidade ne’ebé ema presiza hodi kontribui ba rekursu hodi haforsa konstrusaun estadu no nasaun.

Nia dehan, iha pontu rua importante ne’ebé presiza revé ba dosente sira maka kualifikasaun tékniku husi dosente ne’e rasik katak nia hanorin siénsia ida ne’e ninia background tenke mai husi área ne’e. Iha parte seluk ema mós haree pedagojia katak nia bele iha koñesimentu téknika maibé, nia laiha abilidade oinsá transfere ka halo formasaun ida ne’e mós prienxe kritéria hanesan dosente ida ba Instituisaun akreditadu ida.

Formasaun ida ne’e hola parte atu UNPAZ bele garante kualidade di’ak liután ba estudante sira ne’ebé partisipa iha kursu ne’ebé maka hetan akreditasaun husi ANAAA.

“Ha’u hakarak enkoraja korpu dosente ne’ebé partisipa iha formasaun ne’e katak formasaun ba ita moris la termina bainhira ita hetan ona doutoramentu ka iha nivel ne’ebé aas ha’u hanoin maske formasaun balu ne’ebé ita seidauk partisipa ita partisipa ne’e motivasaun di’ak ida atu eleva di’ak liután ita nia kapasidade hanesan dosente,” dehan Amândio.

Formasaun pedagojia ne’e foka liu ba kurríkulu ne’ebé dezenvolve kona-ba Training and Assessment ho Formadór husi CFP tuir planu Technical Vocational Educational and Training (TVET) katak kualidade ensinu nian ida ne’ebé iha grau aas hanorin sira ne’ebé grau ki’ik ida ne’e maka CFP aplika.

Formasaun ne’e kompostu husi teoria hala’o durante fulan ida (1) no pratika durante fulan neen (6), iha pratika formadu sira hanorin iha sira nia universidade depois avaliador sira ba avalia antes kualifika sira tuir sira nia nivel.

Formasaun dahuluk ne’e partisipa husi korpu dosente na’in-32 ho lisaun prinsipál kona-ba oinsá metodolojia hanorin ne’ebé di’ak .

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here