Prezidente Autoridade Munisípiu Dili, Gaspar Soares. Imajen/Tatoli

DILI, 21 outubru 2020 (TATOLI)—Prezidente Autoridade Munisípiu Dili, Gaspar Soares, preokupa ho semitériu públiku Becuse ne’ebé 90% atu nakonu ona, entaun nia parte servisu hamutuk ona ho ministériu relevante hodi identifika rai no tuir planu sei harii tan semitériu foun ba komunidade sira iha Kapitál Dili hodi substitui semitériu públiku Because.

Notísia Relevante: Governu planea hari’i semitériu foun iha Metinaro

“Ho kestaun ida-ne’e, ami koordena ona ho Terras Propriedade Munisípiu Dili hamutuk Ministériu Agrikultura no Peskas (MAP) no Ministériu Obras Públika (MOP), ami identifika ona rai ho nia luan hectare 25  iha Postu Administrativu Metinaro para harii semitériu ba komunidade sira iha kapitál Dili hodi subtitui fali ba Semitériu Públiku Becuse,” dehan Gaspar Soares ba jornalista sira iha nia knaar fatin Matadouro, Dili, kuarta ne’e.

Semitériu públiku ne’ebé mak harii iha Postu Administrativu Metinaro ne’e, nia dehan, sei sai semitériu ikus iha Dili katak konstrusaun ne’e ramata futuru sei laiha tan semitériu públiku.

Nia hateten, Munisípiu Dili tenke jere semitériu ne’e ho di’ak para durasaun to’o tinan lima de’it, tanba depois sei kee fali mate-isin no tau fali iha urna laran nune’e rai kuak sira ne’e bele re-uitliza.

“Tinan lima ba leten mak ita sei kee fali mate ruin no tau iha urna depois rai kuak sira ne’e ita sei re-utiliza,” nia hateten

Tanba ne’e, nia hateten, Governu Munisípiu Dili sei aplika taxa ba ema ne’ebé haloot mate isin iha semitériu públiku foun Metinaro tanba ho razaun halo fali manutensaun ba semitériu refere.

Asuntu ne’e Munisípiu Dili konklui ba planu 2021 nian no hein katak iha 2021, Munisípiu Dili iha orsamentu natón atu hahú halo konstrusaun inklui halo indeminizasaun ba rai no ai-horis ne’ebé moris iha fatin no rai ne’ebá.

Jornalista: Osória Marques

Editor: Cancio Ximenes

HAKEREK NO HATÁN

Please enter your comment!
Please enter your name here