Komunidade hamoos rate iha Semitériu Santa Krús. Imajen/Nelson de Sousa

DILI, 06 outubru 2020 (TATOLI)-Governu liuhosi Ministériu Administrasaun Estatál (MAE), planea sei hari’i semitériu foun iha área Metinaro hodi fasilita komunidade sira iha Kapitál Dili bainhira atu hakoi mate-isin.

Ministru Administrasaun Estatál, Miguel Pereira de Carvalho, hatete iha proposta Orsamentu Jerál Estadu (OGE-sigla portugés) 2021 sei prevee purvolta rihun 200 hodi fó indemnizasaun ba komunidade afetadu ne’ebé hela iha rai kuaze hektare 25 iha fatin ne’ebá.

Notísia Relevante :Konsellu Veteranu sei halo Semitériu Espesiál iha munisípiu

“Agora ita presiza tau osan para 2021 ne’e ita bele fó ona kompensasaun ka indemnizasaun ba ema sira ne’ebé mak hela iha área ne’ebá atu nune’e bele inisia daudaun ona konstrusaun ba Semitériu Metinaro,” nia informa ba jornalista sira iha Parlamentu Nasionál, tersa ne’e.

Polítika MAE nian ne’e atu antisipa mosu problema entre komunidade sira bainhira atu haloot mate-isin iha semitériu públiku sira, tanba daudaun ne’e, iha Semitériu Becusse, rate komesa nakonu  no laiha ona espasu foun atu hakoi mate-isin.

Kona-ba kustu atu selu ba Governu bainhira uza semitériu públiku hodi hakoi mate-isin, Governante ne’e, hateten iha tempu badak, MAE sei kria dekretu lei ida hodi regulariza jestaun semitériu nune’e ema labele halo kobransa ilegál hasoru komunidade bainhira atu haloot mate-isin.

Notísia Relevante :Komunidade Hahú Hamoos Semitériu

Jornalista:Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here