Ministeriu Ensinu Superior Siensia no Kultura, MAKLN no MSSI asina MoU. Imajen/Tome Amado.

DILI, 08 setembru 2020 (TATOLI)-Governu Konstitusionál da ualu iha tinan ne’e sei oferese rejime espesiál ba oan kiak sira atu asesu Universidade Nasionál Timor Lorosa’e (UNTL) no Institutu Politékniku Betano (IPB).

Atu implementa polítika ne’e maka  iha tersa (08/09) Ministru Ensinu Superiór Siénsia no Kultura (MESSK), Longuinhos dos Santos no Vise Primeiru-Ministru atuál Ministra Solidaridade Sosiál Inkluzaun (MSSI), Armanda Berta dos Santos, ho Ministru Asuntu Kombatente Libertasaun Nasionál (MAKLN), Júlio da Costa Sarmento “Meta Malik” asina ona nota intendimentu (MoU-sigla inglés) hodi implementa polítika ne’e iha 2020.

“Tinan ida ne’e ita kria tan rejime hakbi’it ba kbi’it la’ek oan sira atu bele hetan asesu ba UNTL no Institutu Politékniku Betano maibé ita mesak de’it labele halo buat ida, ita presiza apoiu MSSI nian mós,” informa Ministru Longuinhos dos Santos, iha salaun Ian Martin INFORDEPE Matadouro Dili.

Iha biban hanesan Vise Primeiru-Ministru, Armanda Berta dos Santos, apresia polítika MESSK nian tanba fó mós oportunidade ba oan kiak sira atu estuda iha UNTL.

Polítika ida ne’e tenki valoriza atu fó biban ba ema hotu espesiál ba kbi’it la’ek atu bele asesu mós ba instituisaun ensinu Superiór Públiku.

“Ita sei la taka matan ba povu ida ne’e ita sei la husik sidadaun ida iha kotuk, ita sei esforsu atu kbi’it la’ek nia-oan sira bele hetan oportunidade asesu engresu ba iha UNTL no IPB,” dehan Governante.

Ikusliu Magnífiku Reitór UNTL, Francisco Miguel Martins, maski Governu liuhosi Ministériu tolu asina MoU ne’e, maibé UNTL seidauk iha desizaun atu oferese totál vaga hira ba Governu hodi oferese ba oan kiak sira.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here