Deputadu Partidu Demokrátiku (PD), Adriano do Nascimento. Imajen TATOLI/Egas Cristovao

DILI, 20 outubru 2020 (TATOLI)– Bankada Partidu Demokrátiku (PD) iha Parlamentu Nasionál (PN) husu Governu atu hamosu polítika ida hodi bele halo balansu entre reseita no despeza.

Membru Partidu Demokrátiku, Deputadu Adriano do Nascimento ko’alia asuntu ne’e tanba kada tinan sempre halo levantamentu hosi fundu petrolíferu hodi finánsia Orsamentu Jerál Estadu (OJE).

Nia fundamenta, reseita hosi mina no gás hahú menus tanba mina matan Bayu Undan komesa atu maran, reseita doméstika la sa’e ka la boot liu tanba setór produtivu seidauk la’o di’ak, liuliu setór privadu sira mós seidauk la’o ho di’ak nune’e ekonomia Timor-Leste nian depende liu ba setór públiku ka fundu petróleu.

Membru Komisaun A (Justisa no Konstitusionál) ne’e mós halo previzaun katak Timor-Leste nia tusan hahú aumenta no iha tendénsiu ida atu iha tusan barak liu tanba reseita doméstika no fundu mina rai ne’ebé menus ba beibeik.

“Ha’u-nia pergunta ba governu oinsá ita atu koloka ita-nia polítika hodi halo balansu entre reseita no komparasaun ho despeza ne’ebé estadu atu halo? Tanba ne’e, ha’u preokupa liu entre reseita no despeza Estadu ninian”, Deputadu Adriano do Nascimento hato’o hanoin ne’e liuhosi debate planu rekuperasaun ekonómiku, iha Parlamentu Nasionál, tersa ne’e.

Deputadu Adriano hatutan, impase polítiku ne’ebé naruk no tama tan surtu Covid halo estadu mós tenke halo despeza ne’ebé boot.

Ho preokupasaun ne’e, Deputadu PD ne’e husu governu kria alternativa seluk liuhosi kréditu ba indústria ki’ik sira nune’e indústria ki’ik bele funsiona.

Nune’e mós alternativa seluk ne’ebé governu presiza halo mak apoia atividade soru-tais maibé ne’e mós tenke iha merkadu.

“Di’akliu funsionáriu hotu-hotu uza tais nune’e komunidade sira-ne’ebé soru-tais bele kontinua atividade ne’e”, katak nia.

Entretantu iha loron 15 outubru liubá Governu aprezenta proposta OJE 2021 ba Parlamentu Nasionál ho montante biliaun $1.895 komposta hosi saláriu no vensimentu millaun $ 239,26, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Hosi montante biliaun $1.895 foti barak liu hosi fundu petrolíferu ho montante biliaun $1.377,6 hosi fundu petrolíferu hodi finánsia OJE 2021.

Notísia relevante:PN aprova proposta OJE 2020 iha faze jeneralidade

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here