Primeiru-Ministru, Taur Matan Ruak, hamutuk ho membru Governu sira defende Proposta OJE 2020 iha debate faze jeneralidade ba loron daruak, iha sala plenáriu PN, sesta (02/10). Imajen Tatoli/António Gonçalves

DILI, 02 outubru 2020 (TATOLI)—Reprezentante povu sira iha uma fukun Parlamentu Nasionál aprova ona proposta Orsamentu Jerál Estadu (OJE) 2020 iha faze jeneralidade ho despeza biliaun $1.497,1.

Notísia Relevante: Faze jeneralidade, deputadu sira tenke foka ba prinsípiu no sistema orsamentu

Proposta-lei orsamentu 2020 iha faze jeneralidade ne’e aprova ho rezultadu votasaun a-favór 44 , kontra 0 no abstensaun 21

“Ho nune’e OJE 2020 pasa iha jeneralidade,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária, sesta ne’e.

Parlamentu Nasionál aprova ona proposta-lei Orsamentu Jerál Estadu (OJE) 2020 iha faze jeneralidade ba despeza ho montante orsamentu biliaun $1.497,1, ne’ebé prevee ba saláriu no vensimentu millaun $206,7, bens (sasán) no servisu millaun $499,3, transferénsia públika millaun $568,7, kapitál minór millaun $8,9 no kapitál dezenvolvimentu millaun $213,4.

Montante orsamentu biliaun $1.497,1 ne’e Governu ezekuta hahú hosi janeiru to’o 31 agostu 2020 hamutuk millaun $600,4 liuhosi Dotasaun Temporáriu Orsamentál (DOT) no resta orsamentu hela millaun $896,7.

Xefe Bankada FRETILIN, Deputadu Francisco Miranda Branco, valoriza maturidade polítika povu no louva VIII Governu Konstitusionál tanba bele hakotu impase polítiku hodi lori esperansa foun ba Timor-Leste.

“Ita-nia hotu nia kooperasaun no servisu hamutuk Timor-Leste la’ós ona estadu frajil no husu ba povu lalika fiar propaganda barratu maibé fiar de’it Governu ida-ne’e hodi hadi’a kualidade moris povu tomak nian. Bankada FRETILIN para sempre apoia hodi hakotu mandatu ida-ne’e. Ikus liu orsamentu ne’e lori esperansa no naroman hodi valoriza grupu agrikultór sira,”  deklarasaun polítika hosi bankada FRETILIN.

Entretantu Vise-Xefe Bankada CNRT, Deputadu Patrocínio Fernandes dos Reis, konsidera VIII ne’e laiha lejitimidade konstitusionál tanba “viola” Konsituisaun no Lei Orsamentu no Jestaun Finanseira (LOGF-sigla portugés) iha aprezentasaun orsamentu 2020.

”Ho razaun legál no haree hosi inkapasidade Governu, iha ezekusaun no laiha sentidu estadu atu halo polítika poupansa ne’ebé ami esplika liubá, bankada CNRT foti pozisaun katak iha jeneralidade seidauk bele fó votu favorável ba proposta Orsamentu Jeral Estadu 2020,” dehan Vise-Xefe Bankada CNRT.

Iha fatin hanesan, Vise-Xefe bankada PLP, Deputadu Francisco de Vasconcelos apresia ho bankada kiik sira iha parlamentu ne’ebé deklara votu favorável ba orsamentu 2020.

“Kontinua fó apoiu ba Governu, liuliu tinan ida-ne’e ita sei tau-matan ba pandemia COVID-19 tanba moras ne’e rasik seidauk iha nia solusaun, husu Governu tau atensaun iha fronteira,” Vise-Xefe Bankada PLP ne’e hateten.

Nune’e mós Xefe Bankada PD, Deputadu António da Conceição “Kalohan”, hateten desizaun ne’ebé órgaun ida-ne’e hola mak sai pontu prinsipál ba destinu nasaun nian.

Nia hatutan, prosesu dezenvolvimentu Timor-Leste liuhosi polítika orsamentu Estadu nian no ohin iha uma fukun, tanba  povu sei moris maioria ho susar laran, kuran la’ós tanba laiha maibé tanba fasilidade laiha.

“OJE 2020 labele hadi’a povu nia moris no hadi’a estrada maibé bele hadi’a setór agrikultura no indústria sira seluk. Orsamentu ida-ne’e tenke sai normalizasaun ba polítika nasionál hodi viabiliza dezenvolvimentu nasionál,” Kalohan dehan.

Entretantu Xefe Bankada KHUNTO, Deputada Olinda Guterres, fiar katak orsamentu ida-ne’e sei fó resposta ba kondisaun ekonomia rai laran liuhosi pakote rekuperasaun ekonómika.

“Orsamentu ne’e sei kombate ki’ak iha rai laran no rekomenda ba Governu atu investe iha setór produtivu sira hanesan agrikultura hodi hadi’a kualidade edukasaun ne’ebé baze fundamentu ba rekursu umanu,” Deputada Olinda Guterres hateten.

Entretantu, Xefe Bankada Frente-Mudansa (FM), Deputada Maria Isabel, apresia aprezentasaun proposta orsamentu 2020 no apoia orsamentu 2020 iha faze jeneralidade maibé husu apoia universitáriu sira tanba situasaun ekonomia atuál universidade sira-nia ezsiténsia sei mantein.

“Sira selu dosente sira hodi kontinua hanoin estudante sira, ne’e parte ida ba ita-nia ekonomia rai-laran,” nia fó hanoin ba Governu.

Xefe Bankada UDT, Deputadu Francisco Xavier Carlos, apoia Primeiru-Ministru atu governasaun ne’e sai di’ak liu.

Xefe bankada PUDD, Deputadu António de Sá Benevides, hateten sei apoia OJE 2020 ne’e hadi’a povu nia moris.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here