iklan

NASIONÁL, COVID-19, HEADLINE

Segunda semana oin, Governu sei halo pagamentu subsídiu $200

Segunda semana oin, Governu sei halo pagamentu subsídiu $200

Diretór Jerál, Ministériu Solidariedade Sosiál no Inkluzaun (MSSI), Rui Manuel Gago Exposto. Imajen Tatoli/Egas Cristóvão.

DILI, 19 outubru 2020 (TATOLI)–Governu liuhosi Ministériu Solidariedade Sosiál no Inkluzaun (MSSI) sei halo pagamentu subsídiu $200 iha segunda semana oin (26/10/2020) iha fulan ne’e.

Notisia Relevante: Lista reklamasaun iha ona faze preparasaun ba pagamentu

“Agora daudaun ne’e ita taka ona naran benefisiáriu ne’ebé elizível atu simu subsídiu $200 ne’e iha sede suku no ita sei halo pagamentu ba reklamante sira iha semana oin (26/10/2020) iha fulan ida-ne’e,” dehen Diretór Jerál MSSI, Rui Manuel Gago Exposto, ba jornalista Agência TATOLI iha nia knaar fatin MSSI Caicoli, Dili, segunda ne’e.

Nia hateten, lista reklamante sira-ne’e MSSI haruka ona ba autoridade komunitária sira iha sesta semana kotuk (16/10/2020) hodi taka sai iha ida-idak nia sede suku.

“Ami haruka ona lista reklamante sira ba autoridade komunitária sira iha semana kotuk (16/10/2020) hodi taka iha ida-idak nia sede suku para benefisiáriu sira bele haree ona,” nia dehan. 

Lista reklamasaun iha territóriu Timor-Leste, nia dehan, benefisiáriu hamutuk 2.909 mak elizível atu simu subsídiu $200 ne’e.

Hosi totál reklamante 2.909, Rui Gago hateten, benefisiáriu barak liu mak hosi Munisípiu Dili ho totál reklamasaun hamutuk 1.291.

Munisípiu Ainaro iha totál reklamasaun hamutuk 120, Aileu 98, Baucau totál reklamasaun 304, Bobonaro reklamasaun 17, Covalima 130, Dili reklamasaun hamutuk 1.291, Eremera iha  reklamasaun 31, Lautem iha reklamasaun 84, Liquiça iha reklamasaun 386, Manatuto reklamasaun 109, Manufahi reklamasaun 31, RAEOA reklamasaun 266 no Viqueque reklamasaun hamutuk 22.

Prosesu pagamentu, nia hateten, xefe suku ho ekipa munisípiu mak koordena no sei foti iha munisípiu hafoin fahe tanba pagamentu daruak ba reklamasaun ne’e hamutuk 2.909 ho osan purvolta rihun $581 de’it. 

Tanba ne’e, nia dehan, la presiza involve ekipa nasionál no transporte aluger sira maibé Banku Nasional Komérsiu Timor Leste (BNCTL) mak sei lori to’o iha munisípiu sira. Durasaun pagamentu mínimu loron tolu (3) no másimu mak loron lima (5).

Jornalista: Osória Marques

Editór: Cancio Ximenes

iklan
iklan

Leave a Reply

iklan
error: Content is protected !!