Ofisiail Funsionariu husi Ministeriu Solidaderidade kontinua atende komunidade sira hodi halo pagamentu subsidiu 200 dolar iha Sede Suku Bairo Pite, Dili, Kuarta 25 Juinu 2020. Imajen/Antonio Goncalves

DILI, 13 outubru 2020 (TATOLI)–Xefe Gabinete Estudu, Planeamentu no Dezenvolvimentu Institusionál, Ministériu Soliraridade Sosiál no Inkluzaun (GEPDI-MSSI), Gil da Cruz, hatete finalamente rezultadu reklamasaun ne’e iha ona no tempu badak sei taka iha suku sira iha territóriu Timor Leste.

Notisia Relevante: Reklamasaun verifikadu hamutuk 12.590 sei simu subsídiu $200

“Ita-nia prosesu no progressu hosi dadus reklamasaun sira-ne’e, ita bele hateten katak verifika hotu ona no agora faze preparasaun ba pagamentu,” dehan Xefe GEPDI, Gil da Cruz, ba Agência TATOLI iha nia servisu fatin MSSI, Caicoli, Dili, tersa ne’e.

Nia hatutan, totál reklamasaun ne’ebé mak elizivél atu simu subsídiu $200 hamutuk 2000-resin maibé sei kruza ho dadus hosi Institutu Nasionál Seguransa Sosiál (INSS) nian, tanba presiza hatene ema balun iha rendimentu liu $500 ba leten entaun ne’e sei labale selu.

“Agora ita hein de’it bainhira INSS fó rezultadu dadus reklamasaun mak ita atu halo prosesu pagamentu no taka sai naran elizivél sira iha munisípiu sira hotu inklui Rejiaun Administrativu Espesiál Óe-Cusse Ambeno (RAEOA),” nia hateten.

Nia hateten, uluk totál reklamasaun ne’ebé tama iha MSSI ne’e hamutuk rihun 15 hanesan ne’e maibé diminui tanba presiza kruza ho dadus hosi Ministériu Administrasaun Estatál (MAE) nian tanba MAE mak na’in ba dadus ne’e.

“Ita la’o ho rekezitu ne’ebé mak hatuur ona nune’e ita presiza kruza ho dadus hosi MAE atu identifika loloos katak ida ne’ebé mak elizivél atu simu subsídiu $200 ne’e,” nia dehan. 

Koordenadór Sekretariadu Ekipa Taskforce COVID-19 MSSI ne’e haktuir, hosi totál 2000-resin ne’e, agregadu família hosi Munisípiu Dili mak barak liu.

Entretantu, nia dehan, horisehik ekipa reklamasaun MSSI nian entrega ona proposta reklamasaun nian ba ministra (MSSI), Armanda Berta dos Santos, no hein orsida ministra bele despaixa ona mai, nun’e kontinua prosesu ba Ministériu Finansa (MF).

Kona-ba osan pagamentu $200 ne’e, koordenadór ne’e hatete katak osan operasionál purvolta rihun $600 ne’ebé mak sei selu ba agregadu família iha muniípiu 12 inklui ho RAEOA.

Ho asuntu pagamentu uma-kain nian, nia hateten, ministra sempre husu prosesu verifikasaun ba lista reklamsaun nian ne’e to’o iha ne’ebé ona.

“To’o agora ministra mak presizamente husu nafatin prosesu verifikasaun ba lista reklamasaun no ita-nia ministra husu atu aselera no tenke halo prosesu ba pagamentu nian,” nia dehan. 

Bainhira kruza hotu ona dadus, nia haktuir, parese semana ne’e ka semana oin ekipa bele taka sai ona lista reklamsaun iha suku sira hotu.

Tuir nia, prosesu pagamentu sei la involve ema barak tanba lista reklamasaun ne’e hela uitoan de’it tanba ne’e presiza diminui tiha ekipa pagamentu hosi nasionál.

“Ita sei la involve ekipa pagamentu hosi nasionál tanba ita-nia lista reklamasaun menus ona entaun ita só involve de’it ekipa munisipál nian de’it, maibé ekipa ne’ebé mak akompaña no halo monitorizasaun ne’e kontinua partisipa iha prosesu pagamentu ne’e. Ita tenke hamenus gastu,” nia esplika. 

Kona-ba transporte, nia hateten, Governu iha karreta Patrimóniu Estadu nian maibé sei haree lai tanba seidauk hatene ekipa MSSI nian ne’ebé mak atu akompaña prosesu pagamentu ne’e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here