Prokuradór Jerál Repúblika, José Ximenes. Imajen Tatoli /Egas Cristovão

DILI, 19 outubru 2020 (TATOLI)-Prokuradór Jerál Repúblika (PGR), José Ximenes, hateten, Ministériu Públiku (MP) halo ona rekursu kontra desizaun primeiru instánsia Tribunál Distritál (TDD) ba krime tráfiku ilísitu droga ne’ebé envolve arguidu Casimiro Mateus Botelho ho pena prizaun efetivu tinan-lima (5).

Notísia Relevante : Krime tráfiku ilísitu droga, TDD kondena Casimiro Mateus pena prizaun tinan-lima

Iha loron 7 outubru 2020, Tribunál Distritál Dili (TDD)  kondena arguidu Casimiro Mateus Botelho ho pena prizaun efetivu tinan-lima (5) tanba faktu provadu komete krime tráfiku ilísitu droga, ne’ebé simu sasán pakote  kompresór AC karreta nian tau droga iha laran ho tipu sabu-sabu methamphetamine 3.253 kg  ne’ebé autoridade Alfándega prende iha loron 7 janeiru 2019 iha Aeroportu Internasionál Prezidente Repúblika Nicolau Lobato, Dili no ai-moruk droga ne’e arguidu simu hosi Nijerianu ida ho naran Valentin Okpagu.

“Ami hatama tiha ona ba  Tribunál Distritál Dili nia desizaun aplika pena prizaun tinan-lima ba arguidu ne’ebé envolve iha kazu droga tanba  pena ida ne’e kaman tebetebes,” afirma José Ximenes ba jornalista, ohin, iha Palaçio Prezidensiál, Dili.

Nia preokupa maka juis ne’ebé prezide julgamentu ba prosesu kazu refere foin tama iha karreira sai juis seidauk to’o tinan ida.

“Ami la dehan la’ós laiha kapasidade, maibé experiénsia seidauk iha tanba ne’e presiza halo jestaun ida ne’ebé mak di’ak,” Prokuradór Jerál Repúblika, José Ximenes hateten.

José Ximenes hatutan, desizaun Tribunál nian presiza tetu haree ba situasaun hotu, tanba droga  puru ne’ebé iha  bele multiplika valor osan  USD  millaun tolu-resin.

Nia mós kompara katak iha loron 17   setembru, tinan ne’e, TDD mós foti desizaun finál ba arguidu Jerry Gabes Bunao, nu’udar sidadaun Filipina ho pena prizaun efetivu  tinan-10 tanba faktu provadu komete krime tráfiku ilísitu  droga iha Timor-Leste, iha ne’ebé haruka kazal timor-oan  ne’ebé autoridade Indonézia kaptura iha fronteira Terrestre Motain, Timor Osidentál, ho evidénsia lori Pill Ecstasy ho totál musan  4.874.

“Maibé tanbasá mak arguidu ida-ne’e  aplika de’it pena tinan-lima, ita haree droga kilograma ne’ebé iha,’’ nia hateten.

José Ximenes konsidera aplikasaun  pena refere atu loke tan odamatan ema tama nafatin, nune’e bainhira desizaun fó sai  tenke haree kona-ba impaktu saida mak ita sei simu no depois desizaun ida ne’e sai tanba tinan-tinan sempre tama ida ne’e responsabilidade.

Nia hateten, Timor-Leste ema uza sai fatin tránzitu droga, tanba primeiru iha  sistema kontrolu frazil, no segundu kestaun kuadru legal, terseiru desizaun Yribunál nian ne’ebé sai fó pena ne’ebé ki’ik.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here